馮盈盈飲食騷後打包鮑魚 澄清為環保「唔會因別人說話改變」呢家食素轉打包生果

女藝人馮盈盈日前為主演劇《逆天奇案》宣傳，劇中佢同酒後亂性嘅陳展鵬「上錯床」引起話題，盈盈直言對迴響感到驚訝。同時，佢回應報道指佢早前拍攝《big big shop感謝祭》時，叫助手打包場內鮑魚海鮮美食一事，現時食素嘅盈盈表示佢出發點係為環保，唔會因為別人批評而改變。

Photo from 馮盈盈 IG

喺TVB劇集《逆天奇案》中，酒後嘅陳展鵬背住未婚妻（林夏薇飾演）同馮盈盈發生不正當關係，令觀眾睇到咬牙切齒，更一度成為網上熱搜。對於劇情引起熱議，馮盈盈認為係台前幕後嘅功勞，自己只係做好本分。

Photo from 《逆天奇案》TVB

早前有報道指盈盈攜帶食物膠盒到《big big shop感謝祭》拍攝現場，待拍畢後讓助手打包場內嘅鮑魚海鮮美食。盈盈立即澄清佢並無喺此節目作出如此失禮行為，因為現場有好多客戶。

Photo from 《big big shop新春感謝祭》TVB

Photo from 《big big shop新春感謝祭》TVB

但盈盈坦言，佢年初拍攝節目《天天開運王》時，因為唔夠時間進食每集都放滿全枱嘅菜式，眼見食物於節目拍畢後都被掉入垃圾桶，認為太浪費，所以佢都帶食物膠盒打包，佢認為做法合理。

Photo from 《天天開運王》big big channel

對於報道指佢專攻鮑魚，盈盈澄清佢當時未成為素食者，而且，佢表示除咗鮑魚，其他魚、海鮮、雞、鵝都有打包，認為大家唔洗將焦點放喺鮑魚上。盈盈被問以後會否唔敢再打包節目食物，佢坦言：「我嘅出發點係環保，所以唔會因為其他人嘅說話而改變。呢家食素就轉打包生果、菜同麵包，唔會打包燒肉同鮑魚喇~」

Photo from 《big big shop新春感謝祭》TVB

對於TVB高層杜之克請辭一事，盈盈回應自己都係睇新聞先知，佢呢種「小演員」平時同對方接觸唔多。被問有無影響《逆天奇案》續集計劃，盈盈表示未知開唔開得成。對於佢未開拍嘅選美題材劇集，盈盈話自己連演咩角色都唔清楚，現時收到嘅資料好少，所以都以平常心面對，若收到工作安排便會全力做好。

Photo from 馮盈盈 IG

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）