超靚啊！四川稻城亞丁係最後的香格里拉！一生人必去一次～

香港人對稻城亞丁係比較陌生，小編都係喺年幾前，無意中係朋友嘅Facebook見到D相先第一次認識到稻城亞丁。自此之後，小編就對呢個地方念念不忘，覺得一生人一定要黎一次呢一個「最後的香格里拉」，或者係「藍色星球上的最後一片凈土」。

Photo from Joe Leung Nesta @Facebook

稻城位於四川省西部，距離成都810公里，亞丁則係稻城嘅著名觀光景點之一，由仙乃日(6032公尺)、央邁勇(5958公尺)同夏諾多吉(5958公尺)三座雪山峰包圍組成。

Photo from Joe Leung Nesta @Facebook

呢度嘅景色可以媲美成第二個西藏，靚到好似一幅畫咁。你隨手拎起部手機影張相，唔洗加任何嘅Filters，都已經係大師級嘅作品。近年，稻城阿丁更加成為佐背包客同自駕遊人士嘅旅遊熱點，個個都想黎呢度一睹超級壯麗嘅景色。

Photo from Joe Leung Nesta @Facebook

去稻城亞丁旅遊嘅最佳季節係每年嘅6-10月。所以，各位準備放暑假嘅同學仔，快D抄番D資料，規劃吓同朋友仔去過一個不同凡嚮嘅假期啦~~~

6月-8月，係稻城亞丁嘅夏天，呢個時候，天氣較為晴朗，雖然草原開始變黃，不過都好靚，好適合一班攝影發燒友黎影相。不過，要注意嘅係，夏天晚上下雨嘅時候都多，所以記得帶把遮係身上，唔好變落湯雞啊~~~

Photo from Joe Leung Nesta@Facebook

9月-10月係稻城亞丁嘅秋天，景色亦都係一年之中最有詩意嘅季節，稻城外嘅紅草地同黃色嘅楊樹林令人好似置身於色彩嘅海洋，同藍天白雲交相輝印。小編建議有興趣黎嘅人，盡量選擇係大陸黃金週之後前往，咁樣一黎就可以稍微避開擁擠嘅人潮。

Photo from Joe Leung Nesta@Facebook

不過，其實係任何一個時間去稻城亞丁，都可以接觸到稻城唔同嘅風采，會有唔同嘅感受。小編都好想要個長假，黎呢度影下相，Relax 吓~

Photo from Joe Leung Nesta @Facebook

到今日，香港暫時仲未有直航前往當地，所以，交通方面，要從四川成都轉內陸機到達稻城機場，再搭的士/包車/坐機場巴士去亞丁自然保護區。

更多靚靚相片

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載