林峯即將重返樂壇 成為華納旗下歌手?! 網民期待：「當年被吹捧得太勁 引起反感」

香港樂壇呢幾年都出現唔少實力歌手～最近，有傳林峯打算回歸樂壇，已經同華納唱片完成簽約，並且將於7月8日推出新歌《唱情歌的人》，唔知大家又期唔期待呢？順便同大家重溫一下林峯以前喺樂壇嘅威水史～

Photo from 林峯IG

現年41歲嘅林峯近年專注於喺內地拍戲，呢幾年仲榮升咗做人夫兼爸爸。早前，佢同老婆張馨月就齊齊上內地綜藝節目《妻子的浪漫旅行5》，兩夫婦嘅互動就引起咗網民嘅熱議！

Photo from 林峯微博

日前，有傳林峯已經同華納唱片簽約，即將重回香港樂壇！而華納唱片就上載咗幾張宣傳照，雖然照片比較暗而且相中人只露出半邊面，不過就同林峯非常相似。據悉，佢今次推出嘅新歌《唱情歌的人》將於7月8日推出，係由歌手林家謙作曲同張楚翹作詞，令唔少粉絲都留言表示非常期待佢睽違已久嘅作品～

Photo from 華納唱片IG

Photo from 華納唱片IG

其實林峯嘅粉絲們咁期待都唔係冇原因㗎，事關林峯已經好多年冇出過新歌！初期嘅佢大多數都係唱電視劇主題曲居多，不過成績一直都唔太好。直到2007年，佢喺電視劇《溏心風暴》出演程亮一角，而人氣急升，於同年正式進軍樂壇發行咗《愛在記憶中找你》，成為咗佢第一首冠軍歌曲！

Photo from 《溏心風暴》

後來，林峯亦發行咗幾首經典電視劇歌曲，包括有《愛不疚》、《直到你不找我》等，相信唔少人都對呢啲歌曲非常熟悉～喺2009年，作為樂壇新人2年嘅佢就首次喺紅館舉辦個人演唱會，仲遠赴海外舉辦巡迴演唱會，可見當時人氣非常高！

Photo from TVB娛樂新聞台

Photo from TVB娛樂新聞台

然而，喺2012年林峯憑歌曲《CHOK》而獲得多個獎項，包括有《十大勁歌金曲頒獎典禮》「金曲金獎」、「亞太區最受歡迎香港男歌星」等，引起大家嘅爭議，當時就有唔少網民認為「喺TVB將所有獎俾晒佢」，導致當時佢俾網民瘋狂責罵！

Photo from 《CHOK》MV

Photo from TVB

之後，林峯亦有時不時推出新歌，不過反應已經冇以前咁熱烈，而且網民都已經將佢定型為「MK偶像」。佢拍攝完電視劇《使徒行者》之後，有傳因為攞唔到視帝，滿約就離開TVB，加入英皇娛樂，主力喺內地拍戲發展。

Photo from 《使徒行者》

不過，有部份網民認為其實林峯嘅經典情歌係幾好聽，直到而家偶爾都會聽返；亦有網民認為佢嘅唱歌實力其實唔差，只係當年俾TVB過份吹捧令大眾反感，搞到佢俾網民鬧，認為佢係「犧牲品」！

Photo from 連登討論區

Photo from 連登討論區

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）