【小編私心推介！】IGable影相速成班～堅巷花園＋旋轉樓梯＋美利酒店必學影相技巧！

而家想去外國影靚相真係諗都唔洗諗～不過香港其實有好多線條獨特兼美感十足嘅建築，一樣好值得發掘吓，仲可以影到IG爆Like靚相?！只要識得捕捉呢啲建築特色，好好運用當中嘅幾何美學元素，就算係望落好似平平無奇嘅地方，都可以影到超有個性嘅獨特美照！今次小編就推介3個中西區嘅影相好去處俾大家，快啲同Friend學齊以下嘅呃Like影相技巧，齊齊做影相達人！

#第一站～童心爆發隱世公園：紅白「扭計骰」堅巷花園！

Photo from Hong Kong Tourism Board

Photo from Hong Kong Tourism Board

第一站推介大家去上環醫學博物館附近嘅堅巷花園！只要喺蘇豪區再行上少少就到，算係鬧市入面嘅隱世公園。呢度特別之處係用積木做主題，好似童話世界嘅城堡咁，好多位置都好啱影相！除咗門口必打卡嘅紅白格仔磚牆，小編私心推薦大家去埋2樓嘅洗手間，紅白色嘅「扭計骰」牆超吸睛，影出嚟仲好有童話Feel！而且呢度人流唔算好多，唔使擔心要排隊影相。

小編Tips：唔想只係企定定擺Pose？可以加啲心思，用一啲色調相近嘅小道具，令成張相更加突出！

#第二站～化身Moody電影、MV主角：中環旋轉樓梯！

Photo from Hong Kong Tourism Board

Photo from Hong Kong Tourism Board

第二站要去嘅地方，就係中環美利道同花園道交界嘅旋轉樓梯！相信大家見到都會覺得熟口熟面，因為唔少電影、MV都喺呢度取景，貪佢點影都咁有Feel！呢度最特別嘅係樓梯結構嘅旋轉線條，唔同角度影都有唔同嘅效果。小編建議可以喺樓梯底影上去，加埋直射落嚟嘅陽光，將天橋嘅曲線變成另類相框，立即化身成MV主角！另外可以由上而下咁影，將視角換咗做冇盡頭嘅漩渦，再加埋Wide Angle，輕輕鬆鬆就影到張大師級嘅Moody靚相！

小編Tips：好多人對住鏡頭都好生硬，想影得自然啲？不妨試吓一邊上落樓梯，一邊擺Pose，就算唔望鏡頭，出嚟嘅效果都好自然㗎！

#第三站～跟KOL去熱捧打卡位：香港美利酒店！

Photo from Hong Kong Tourism Board

Photo from Hong Kong Tourism Board

Photo from Hong Kong Tourism Board

最後一站就嚟到呢排好Hit嘅香港美利酒店！成間酒店嘅建築風格都好Modern，以簡潔嘅白色牆身做設計主調，底部樓高三層嘅圓拱形迴廊型格得嚟又有幾分典雅，再加埋金色邊框細節，隨手一影已經令成張相嘅質感Upgrade唔少！小編建議可以試吓喺天橋一邊行一邊影，捕捉又自然又有美感嘅Moment！

小編Tips：成日都驚影到個人好矮？試吓用低角度喺迴廊度影，影到工整嘅幾何天花之餘，仲可以乘機拉長全身比例，隨手影就已經擁有大長腿，呢招必學呀！

#上IG搜尋#discoverhongkong，睇埋其他至Hit打卡好去處！

睇完呢幾個超好影嘅打卡位，係咪心思思想即刻去影返輯靚相呢？其實香港仲有好多別樹一格嘅特色建築，不妨上IG搜尋 #discoverhongkong，睇埋其他你未發掘到嘅城市角落！只要用心搵再攞啱角度，就可以影到充滿藝術感嘅靚相！記得Hashtag埋#discoverhongkong喺個Post度，同其他人分享香港更多特色打卡點！

Text: Holidaysmart editorial

Photo: Hong Kong Tourism Board

Featured for: Hong Kong Tourism Board 

***本文章的圖片均經其本人或其公司授權，其他媒體不得轉載