鄧紫棋出自家商品亂定價惹粉絲不滿！ 4張海報$625 網民：海報用金做？

娛樂新聞

By Stephanie on 17 Aug 2021

Digital Content Writer

鄧紫棋近年於內地人氣高企，獲得唔少粉絲支持，奠定咗於華語樂壇女歌手嘅地位！最近，鄧紫棋嘅工作室就推出周邊商品，慶祝佢30歲生日，但唔少網民就認為商品定價太高，不禁批評佢哋「食水太深」！

Photo from 鄧紫棋IG

鄧紫棋於2014年因為參加節目《我是歌手2》演唱《泡沫》於內地一炮而紅，人氣一直飆升，吸引足足逾3000萬人於微博追蹤，迅速成為全球華語圈嘅知名女歌手之一！

Photo from 《我是歌手2》

Photo from 鄧紫棋微博

近日，鄧紫棋迎來佢嘅30歲生日，而佢就於IG發長文抒發感受，覺得30歲係人生另一個階段，有感而發地話「曾經越多的心碎讓我越珍惜現在擁有的一切」，並於文末勉勵自己。而佢亦上載咗多張照片同影片，感動表示朋友為咗佢花費4小時舉辦生日派對，令佢忍唔住感動大喊！

Photo from 鄧紫棋IG

而鄧紫棋工作室就於生日當日（16日）正式出售鄧紫棋周邊商品，包括有風褸、T-shirt以及海報，而且價錢都唔算便宜，令唔少網民都感到十分不滿，認為商品嘅定價過高！

Photo from 鄧紫棋工作室微博

其中有網民就直指海報價格最唔合理，一組4張嘅海報竟然需要人民幣$520（約港幣$625），令唔少網民都湧進工作室微博留言「海報鑲金了？」、「比韓星定價還要高？」等，亦有部份網民不滿商品設計，「真的有人會覺得好看？」，大家都似乎對今次嘅周邊商品有好多意見！

Photo from 鄧紫棋工作室微博

有網民就突破盲點，表示分開買4張海報嘅價錢竟然比買一組海報便宜「119×4不才476嗎，倒也不必硬湊520」，斥責鄧紫棋工作室過分貪心「食水深」！而且商品價錢咁高，根本就冇考慮過仲係學生嘅粉絲，有部份粉絲憤怒到要求將所有商品下架，事件引起網民熱話，一度登上微博熱搜榜！

Photo from 鄧紫棋工作室微博

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

G.E.M.鄧紫棋內地獻唱改疑敏感歌詞「亂世」變「巒石」網民疑自我審查

3 Jun , 2021

女歌手G.E.M.鄧紫棋近年已將發展重心轉向內地，日前，佢於北京衛視舉辦嘅節目《沸騰之夜》登場，連唱三首歌曲，包括《光年之外》、《句號》同《超能力》，載歌載舞賣力演出。不過，有細心網民發現，部分疑似敏感字眼歌詞被改，喺字幕變成其他詞語，例如「亂世」改成「巒石」、「哀悼」改成「愛道」等等，被懷疑自我審查，引起熱議。

Photo from 鄧紫棋 FB

早前，G.E.M.推出新歌《超能力》，更邀來陳偉霆一齊拍攝MV。G.E.M.日前登上北京衛視節目《沸騰之夜》時當然有獻唱新歌，但有網民就發現字幕顯示嘅歌詞同《超能力》原作有分別，原本係「原地爆炸」被改成「原地包紮」。

Photo from 微博截圖

Photo from 《超能力》MV 鄧紫棋

另有一句歌詞「你炸到我心碎成了煙花」被改成「你紮到我心碎成了煙花」。有網民認為修改有損歌曲原意，感到惋惜。

Photo from 微博截圖

Photo from 《超能力》MV 鄧紫棋

而另一首歌曲《光年之外》，原歌詞中嘅「亂世」被改成「巒石」，呢首歌共有三句歌詞被改，包括「緣份讓我們相遇『巒石』以外」、「相遇『巒石』以外危難中相愛」、「『巒石』以外是純粹的相擁」。不少網民對此都大感騎呢，認為歌曲意境被破壞。

Photo from 微博截圖

Photo from 《光年之外》MV 鄧紫棋

至於歌曲《句號》，歌中嘅「哀悼」被改成「愛道」，令歌詞變成「窗外不願飛的蜂鳥，也在愛道」。有網民對改動感到疑惑，無法全心投入欣賞演出。

Photo from 《句號》MV 鄧紫棋

對於G.E.M.嘅演出，唔少網民都對佢穩定跳唱能力表示讚好。但亦有網民留意到以上歌詞修改，無奈問道：「字幕係咪打錯咗？」、「『亂世』怎麼變了？」、「《沸騰之夜》節目組怎麼了？都將歌詞打錯」

Photo from 微博評論

另有網友估計，歌詞改動係為咗配合大陸「傳播正能量」嘅審查，政策尤其針對時下偶像，因為佢哋受好多年青人追捧，所以佢哋嘅言行舉止非常重要，需要受到監管。有人重提容祖兒嘅先例，去年，佢於東方衛視節目中，同內地組合硬糖少女303成員希林娜依·高合唱張惠妹歌曲《母系社會》時，歌詞都被大幅修改，有指此舉都係為配合「傳播正能量」，歌詞要被節目組審查及修改。