港男交友APP約會被洗$2000 拖手即被女方鬧：「係咪有病？你性格有問題！」

Digital Editor

玩交友app約人，雙方想從對方得到嘅好唔同嘅話好易爛尾。近日，一名港男到討論區表示，佢經交友app約咗個女仔出街，女方洗咗佢近二千大元後，港男為咗想親熱而拖對方手，卻立即被女方拒絕，更被指摘性格差兼「有病」，令港男非常不忿。

Photo from TVB

最近，一名港男於香港討論區發文，稱自己透過交友app認識咗一名女仔，大家傾咗約半個月後便展開第一次約會。

Photo from TVB

首次約會食日本菜、睇戲、買裙洗咗港男約$2000

約會中，女方帶港男到一家日式餐廳食壽司刺身，港男指餐廳價錢「貴到癡線」，而女方亦猶如「三日無食野咁，係咁食」，港男自己則就住咁食。女方食飽後剩下好多食物，於是港男唯有幫佢「執手尾」，最後埋單八百多元。

Photo from TVB

二人於飯後睇戲，完場後港男陪女方買衫，女方最終買了兩條共值約一千元嘅連身裙，同樣由港男找數。此後，港男心中希望可以跟女方拖手及親熱，故提議到公園散步。

Photo from TVB

但事情不似預期，「點知我（港男）一拖手，佢（女方）立即彈開，問我係唔係有病，未經佢同意就拖下手，話我性格有問題，唔可以同我發展落去。」慘食檸檬嘅港男瞬間發火，並當場指摘女方「又食又拎」，自己拖下手卻反被對方罵「有病」。

Photo from TVB

女方聽罷，便立刻將剛買嘅兩條裙「還」比港男，然後表示自己有事要先離開。

對此，有網民認為港男事主「蝕到暈」，亦指點世上無免費午餐，最多只有等價交易，希望男事主學會教訓，以後帶眼識人。

Photo from 香港討論區

亦有網民直言，比起交友，兩人互動更似一場交易，「一個貪財，一個貪色，各求所需，記得下次要講好價格先」、「你想呃蝦條，人哋想呃錢，你技不如人有乜好講？」、「交易吧啦，交咩友呀！」事主對此則癡情回覆：「我係真心想搵個女朋友~」

Photo from TVB

Photo from 香港討論區

有網民直指該女只會收錢收著數，收人做兵，係一名自以為高人一等嘅港女。

Photo from 香港討論區

不過，另有人批評男事主無問過人就拖手太猴擒，亦有其他網民表示：「八百幾蚊你有份食，至於買衫你扮大方埋單冇計，而最後比返兩條裙你，我諗你一定覺得已經洗左錢所以可以飛禽大咬！」對此，事主稱女方話自己無帶錢，故不想於現場爭論便「乖乖畀錢」。

Photo from 香港討論區

有網民則認為兩個人去日本餐廳食八百蚊嘢唔算太貴，至於兩條裙，則可以當買畀女方下次同自己去街著，若想真心發展嘅話可以比多啲耐性先了解對方。

Photo from 香港討論區

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

【想隨時隨地緊貼本地食買玩資訊？】

👉🏻 即刻Follow我地Instagram holidaysmart.hk

👉🏻 訂閱我地 Youtube Channel