38歲男與74歲婦人共譜忘年戀！訂婚後先知道女方年齡：對佢一見鍾情！

By Stephanie on 16 Dec 2021

Digital Content Writer

唔知大家又認唔認同「愛情係唔會受年齡所限制」呢句話呢？！韓國一對相差36年嘅「忘年戀」情侶，因為年齡差距而受到網民們嘅關注！佢哋仲一齊開設自己嘅頻道，成為YouTuber，成功吸引唔少網民嘅目光，但亦有網民認為佢哋兩人只係逢場作戲，為咗炒熱話題賺錢！

Photo from Youtube「a loving couple」

# 相差36歲戀情！

韓國一對相差36年嘅「婆孫戀」上年就以情侶檔開設自己嘅YouTube 頻道「a loving couple」，瞬間吸引到網民們嘅關注！兩人關係甜蜜，而男方亦公開表示完全唔介意女方年紀大，仲公開放閃話「無論佢幾多歲都好，喺我心目中都係最靚嘅！」

Photo from Youtube「a loving couple」

# 兩人透過拍攝YouTube公開戀情！

現年74歲嘅玉順子以及38歲嘅全東基喺2020年8月透過拍攝YouTube影片，向大眾公開戀情，兩人第一支影片就成功吸引逾77萬人觀看！根據影片所講，男方對玉順子一見鍾情，兩人已經交往8年，並決定要訂婚並同居。

Photo from Youtube「a loving couple」

# 女方曾謊報年齡？！

不過喺第一支影片曝光後，有網民隨即踢爆玉順子謊報年齡，當時嘅佢自稱63歲，足足比實際年齡差咗10歲咁多！而男方就喺直播中透露，當時謊報年齡係因為害怕女友年齡會被嫌棄；而且玉順子喺初初認識佢嘅時候都自稱63歲，直到訂婚當晚，佢同女友拖手時覺得「皮膚觸感唔啱」，女友先將自己真實年齡話佢知道，但依然冇影響兩人間嘅愛！

Photo from Youtube「a loving couple」

# 兩人已經結婚？！

據悉，兩人公開戀情嘅時候就已經展開同居生活，但就礙於經濟能力問題而遲遲未有結婚，男方曾經承諾「一有能力就會立刻同玉順子結婚」，但暫時都未能知道兩人是否已經正式成為夫妻。而佢哋都同好多夫妻一樣，希望能夠擁有自己嘅小朋友。由於玉順子年紀比較大，所以兩人都曾經試過唔同嘅方式，可惜都失敗吿終！

Photo from Youtube「a loving couple」

# 感情遭受韓國網民質疑！

雖然兩人嘅感情看似甜蜜，不過佢哋都經歷咗好多爭議，受到唔少網民嘅質疑，好多人都覺得兩人只係「工作拍檔」，因為兩人都似乎對拍攝影片以及置入廣告嘅流程非常熟悉;而且眼利嘅網民亦發現佢哋嘅「情侶照片」都係近期拍攝。另外，傳佢哋曾經喺上綜藝節目嘅時候，因為忘記關mic而曝光兩人私底下嘅對話「忍多3個月，就賺夠錢！」，令網民們對於佢哋兩人嘅感情更加懷疑！