外傭拍片大呻離鄉別井打工辛酸史爆紅！自揭工作20年背後感人主僕情

近日一段外傭姐姐自拍片爆紅，片中佢大呻有僱主對外傭好差，更爆出唔少金句：「你有錢大晒呀？」、「你係老闆乜都啱晒」等，原來呢位外傭姐姐係YouTuber，佢最近再度拍片，更透露自己擁有20年工作經驗，以及拍片嘅原因。

外傭姐姐以半鹹淡廣東話拍片鬧爆傭主爆紅

網上流傳一段短片，片中一位疑似外傭姐姐以半鹹淡廣東話鬧爆部分傭主，指外傭嘅待遇唔好，傭主要求多多等。由於片中外傭姐姐表情不屑，廣東話雖然唔正，但十分流利，加上爆出好多金句，成功爆紅。

唔少外傭都爭相模仿拍片，連阿Bob（林盛斌）屋企嘅外傭姐姐都有扮埋一份，原片中「有錢大晒呀？」、「你依家試下請工人，請到咩？」、「你畀錢幾多啫？4千幾咋嘛！」、「工人都係人嚟㗎！」、「你係老闆乜都啱晒，你唔使請人啦自己做啦！」等金句引起熱議。

2月開YouTube，外傭姐姐再拍片回應事件

除咗喺傭主同外傭圈子掀起關注外，片中外傭姐姐句句精警，唔少網民都表示：「講中晒打工仔心聲！」原來拍片嘅外傭一直都有經營YouTube Channel，並拍咗唔少片。

呢位外傭姐姐喺「爆紅」後有發文回應事件，佢近日更再度出片，自揭拍片鬧爆傭主嘅原因，又分享佢個人嘅經歷，又一次成為網民焦點。

為同胞發聲，希望僱主善待外傭，互相體諒

佢提到自己拍片鬧爆「有錢大晒呀？」唔係因為依家嘅傭主，佢更為拍片而對自己傭主造成不便感到抱歉。外傭姐姐指佢見到唔少同胞離鄉別井卻受到唔好嘅對待，唔只工作量龐大、僱主又要求多多，先會有感而發。佢強調拍片原意係為同胞發聲。

佢表示希望傭主都可以善待外傭，認為最重要係互相體諒，互相尊重：「你做老細，點對姐姐？」佢指好多外傭來港工作，照顧僱主一家生活，但自己嘅家庭則無人幫手照顧，離鄉別井甚至連兒子都見唔到。

感人主僕情，前僱主飛香港探望

佢指大家住埋同一屋簷下，僱主可以主動關心下姐姐，大家傾下偈。佢更分享自己嘅個人經歷，擁有20年工作經驗嘅佢曾經喺新加坡一個僱主家工作咗6年，大家關係好好，佢指僱主平時會同佢傾偈，了解佢、關心佢，甚至喺佢轉去香港工作時更專程飛嚟香港探望佢，感情十分深厚。

拍片更為教姐姐「學識點做人」

外傭姐姐稱希望僱主可以耐心教外傭，指外傭做得開心對大家都好，佢又表示自己拍片除咗想為姐姐發聲，更係為咗教姐姐「點做好姐姐」：「唔一定要駁嘴，唔一定要好叻講嘢嘅，只不過識得點樣做人。」

相關文章：蔡一鳳赤柱7000呎海景豪宅曝光！7外傭集體辭職否認係最難頂僱主

相關文章：裕美送鑽石鏈畀林作家外傭做生日禮物！網民嘲做戲：點解送嘢畀人要拍片嘅？

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

更多相關文章

張敬軒晒新早餐！終於唔係食麵包！外傭姐姐煮出新意思令軒仔好感動

29 Oct 2020

張敬軒早前喺Instagram表示屋企嘅外傭姐姐日日準備麵包、白粥做早餐，忍唔住擺上網呻。不過今日軒仔喺Story表示終於有新早餐，令佢感到非常感動！

上星期，張敬軒喺IG公開咗屋企外傭姐姐為佢準備嘅早餐，佢指本來期望每日都食到豐富嘅早餐。

Photo from 張敬軒IG

不過事實上佢由星期一至星期日，日日唔係食麵包，就係白粥：「好多朋友仔問我今朝塊方包點解有手抽嘅？我諗阿遮遮諗住我返工食早餐嘅時候方便啲啩。」

Photo from 張敬軒IG

軒仔甚至將自己IG icon轉咗做方包，更封姐姐做「早餐界KOL」，大讚姐姐好take care佢：「#姐姐愛我 #我愛姐姐」。

Photo from 張敬軒IG

事隔幾日，軒仔喺IG Story晒出新早餐：「我諗佢（外傭姐姐）經過咗幾日嘅醞釀同埋大家對佢嘅期望，今朝終於諗到啲新嘢」

Photo from 張敬軒IG

今次終於唔係麵包，亦唔係白粥，而係Pancake！！！！仲有藍莓裝飾添！

軒仔將新早餐命名為「2020冠狀班戟免疫早餐」，並表示：「#隔離嗰兩件武器擺法係重點」

Photo from 張敬軒IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）