同業主個女拍拖即減$3000租男友居然心動考慮網民：快啲分手

By jack on 15 Jul 2022

Digital Content Writer

出嚟租屋住，若然遇到一個關心租客，仲肯主動減租嘅業主，要小心佢背後可能另有目的。有台灣女網民分享，男友嘅業主太太對佢好好，不但噓寒問暖送禮物畀佢，仲請佢上屋企食飯，甚至提出若男友肯同自己個女拍拖，每月即可減3000元新台幣租金（約787港元）。男友聽完居然表示心動，話只係表面交往唔會動心，引起網民熱議。

放租變搵女婿？

一名女網民喺「匿名公社」facebook群組開po，指業主太太對男友好熱情，但對自己就好冷淡，最初以為男友有長輩緣，後來發現對方真係睇中咗自己男友。事主分享男友同業主嘅對話圖，可見兩者關係唔錯，業主邀男友週末上屋企食晚飯，仲話介紹自己個女畀佢認識。

Photo from 匿名公社

Photo from 《我的女兒叫苦瓜》

積極撮合男友同阿女

即使男友向業主表明：「阿姨，我有女朋友了欸，這樣好嗎？」業主毫不忌諱地指自己個女又唔係外人，認識吓冇咩大不了，仲話如果男友歡喜嘅話，自己可以幫忙撮合，仲話：「萬一結婚的話，那房子就當女兒嫁妝了，你說好不好呀！」，男友居然心動仲回覆再考慮吓。

Photo from 《上流寄生族》劇照

男友話表面交往唔會動心？

事主聽完之後好嬲，但男友竟然想答應業主太太，仲同事主講只係表面交往，自己唔會動心，又話唔會同事主分手，事主覺得好疑惑，話男友個樣睇落超開心，所以開po問網民：「該相信男友嗎？」。

Photo from 《無法成為野獸的我們》劇照

網民反應一面倒勸事主分手

事件引起一眾網民熱烈討論，唔少人都對男友心態感到嘩然「他想要雙吃吧」、「就只貪個3000？」、「阿姨我不想努力了？」，又勸樓主快啲分手，「趕緊離開這種男友吧」、「他的三觀有問題，看對話他竟然還回覆房東考慮看看，這種男人你還要嗎？」，又有人笑言「我覺得你應該把房東太太介紹給我，我把她女兒，這才是王道」