又飛啦～機艙內5個健康小秘訣令你搭飛機都安心過人～去旅行就要去到盡！

去旅行就係為咗放鬆，所以唔好令搭飛機使自己嘅旅程更加攰更加辛苦！機艙環境或多或少都會令人身體感到不適，小編以前都要成日飛同逗留係飛機上，唔多唔少都會儲咗D經驗！以下就提供幾個解決方法，只要你跟足指示， 以後就可以飛得舒適又輕鬆啦～
Photo from Pinterest

1) 反壓動作抵耳痛

好多人都知機艙內氣壓較低，所以飛機起飛降落時，耳仔都會好容易痛。呢個時候，你可以自己帶香口膠食，吞口水，或者做一D反壓動作（唔識做可以即場請教空姐）。
Photo from Pinterest

2) 乾燥脫水勿飲酒

機艙濕度比平時低10-20%，所以搭飛機個時口腔、喉嚨、眼睛、皮膚都會特別乾燥！呢個時候可以多飲暖水，揸吓潤膚膏，而且，都要避免配戴隱形眼鏡！而好多人搭長途機時都會飲少少酒令自己好訓D，但就唔好飲咁多，因為酒後排尿增多，只會更加脫水，令到你成個人更加DRY！
Photo from Pinterest

3) 減食防作嘔作悶

由於機艙內嘅低氣壓會令腸內空氣膨脹20-30%，所以好多人都會出現暈機浪，產生作嘔感。雖然飛機上會有可樂等有氣飲料提供，而某幾間航空公司嘅飛機餐都好好味，但其實戒飲有氣飲品，進食保持適量，少食肥膩食品，就可以減少作嘔作悶嘅感覺！如果有時唔小心食太多飛機餐，都應該係安全情況下係機上行下企下消化下～～
Photo from Pinterest

4) 止咳靠手巾掩鼻

機艙中嘅敏感原、乾燥空氣、臭氧等都會令人引起咳嗽。所以，一個小動作，例如用手巾仔掩鼻呼吸，可以阻隔敏感原同刺激氣管嘅來源，止咳好有效！下次你都可以試下！
Photo from Pinterest

5）感冒／牙痛
仲有好多搭飛機小知識，小編之前都試過患感冒搭飛機，由於機上空氣乾燥，氣壓又低，搭飛機都會好辛苦。口鼻、耳管不適嘅情況更加會比平時嚴重！除咗預先睇醫生拎定藥，係機上依指示食藥、滴鼻、多飲暖水、少飲酒，都可以做一D反壓動作，例如捏緊個鼻、閉嘴大力呼氣，都可以令鼻腔同耳咽管變得暢通，舒緩病情。而如果你有爛牙未整番好，係高空上牙窿內嘅小氣泡都會無限膨脹，頂住牙齒，引起劇痛！

Photo from Pinterest

去旅行係一件開心嘅事，所以唔好係飛機上，因爲種種唔舒服而搞到旅程唔開心～話時話，你下一次又會飛邊呢！？
Photo from Pinterest

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）