51歲藤原紀香再次代言啤酒 網民大讚保養有法 原來曾多次走樣?

現年51歲嘅日本女星藤原紀香日前出席東京嘅啤酒代言活動，做「一日限定老闆」，今次係佢相隔28年再次為啤酒代言，仲同以前嘅自己同框！

Photo from Facebook @Norika Fujiwara

出道30週年

藤原紀香係活動當日身穿黃色和服，顯得優雅有氣質，佢指自己係1994年被任命為品牌第8屆啤酒女郎，當時佢啱啱出道兩年，所以今年係佢出道第30週年！

Photo from Facebook @Norika Fujiwara

笑稱當年扮成熟

活動當日仲擺設咗佢28年前嘅廣告相，51歲嘅佢罕有咁同以前嘅自己同框！佢笑言自己當時應該係啱啱大學畢業，所以努力做出成熟嘅感覺，依家睇返反而覺得有種稚嫩感！被問到想同當年嘅自己講啲咩，佢就話自己之後會發生好多事，但都係開心嘅。

Photo from 朝日啤酒廣告照

網民讚凍齡有法

唔少人大讚佢身材同肌膚都保養得好好，而且至今都保持到優雅形象，稱得上係「美魔女」，不過亦有人話藤原紀香被28年前舊照比下去。

Photo from 朝日啤酒廣告照

曾暴飲暴食多次走樣

原來佢之前曾經因為事業愛情兩失意而暴飲暴食，被傳媒揭發佢身材大走樣。後來參與賀年節目嘅時候，又被指身形暴漲，仲有明顯雙下巴，顯得好蒼老，令人慨嘆歲月不饒人。

Photo from Youtube 截圖

認老自爆有老花

踏入50歲之後嘅藤原紀香都曾經喺公開場合認老，自爆自己40歲之後視力變差，老花仲越嚟越嚴重！不過現時似乎狀態回勇，佢分享養生之道，就係經常會榨蔬菜汁，苦瓜、芹菜同甘荀汁都係唔錯嘅選擇！

Photo from Youtube 截圖

曾與郭富城傳緋聞

藤原紀香係1992年奪得日本小姐冠軍而出道，其後憑完美身材紅遍全亞洲，被封一代「性感女神」！2000年佢受邀來港同天王郭富城拍《雷霆戰警》，因此為港人熟悉，佢地更一度傳出過緋聞，不過兩人都無承認或否認過戀情。

Photo from 《雷霆戰警》海報照

Photo from 《雷霆戰警》劇照

Text: HolidaySmart Editorial （小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）