69歲曾志偉熱情獻吻kiss黎峇菈！180cm女方背景公開

娛樂新聞

By Jennifer on 02 Oct 2022

Digital Editor

今晚食乜餸：小二，嚟一碟花生！

現年69歲嘅曾志偉榮升高層後繼續開拍「獎門人」系列，近日佢為一名馬來西亞模特兒黎峇菈慶祝生日嘅影片公開引發熱議，因為獎門人喺眾目睽睽之下熱情咁錫咗對方一啖！

曾志偉堅持開拍新一輯「獎門人」

曾志偉雖已年屆69歲，但仍堅持幕前演出，即使已為TVB高層，都未退休，更開拍新一輯「獎門人」。「獎門人」曾志偉除咗工作之外，平時生活亦備受關注，最近佢出席一位模特兒嘅生日會就成為全城焦點！

曾志偉現身馬來西亞模特兒黎峇菈生日會

嚟自馬來西亞嘅模特兒黎峇菈喺佢個人IG中公開生日會嘅影片，片中有唔少人出席佢嘅生日會，眾人對佢大唱生日歌，黎峇菈則雙手合十閉眼許願，拍片人更特意影咗「獎門人」曾志偉添！

曾志偉親密錫壽星女

曾志偉亦拍手為黎峇菈唱歌，唱完生日歌後，獎門人仲行近黎峇菈，先係一手搭上黎峇菈膊頭，同佢一齊吹蠟燭，之後更喺眾人面前超級熱情咁向壽星女黎峇菈送上一吻！

黎峇菈似乎亦十分受落，並喺IG留言指：「今年有得同獎門人一齊吹蠟燭，祝我生日快樂，今年的願望是世界和平」，睇嚟獎門人出席到佢嘅生日party，黎峇菈應該十分開心。

黎峇菈身高達180cm

黎峇菈係馬來西亞模特兒，身高有成180cm，與獎門人完全係「最萌身高差」，佢IG有唔少性感照，大方晒火辣身材。佢亦同過唔少香港藝人合照，包括叻哥陳百祥、袁偉豪、張敬軒等。有傳黎峇菈係商人余錦基嘅契女，更係富豪聚會嘅常客？！

「獎門人」系列曾去馬來西亞取景

曾志偉喺馬來西亞知名度唔低，TVB每年都會設「馬來西亞視帝視后獎」，加上獎門人系列有唔少特別篇係去馬來西亞取景，亦邀請過好多當地藝人出演，曾志偉會認識到馬來西亞模特兒黎峇菈一啲都唔奇！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

《開心無敵獎門人》正式回歸！3位新「獎老」加入！曾志偉解釋重啟節目原因：想拍俾年輕人睇！

5 Jul 2022

大台經典遊戲節目《獎門人》系列深入民心，陪伴咗唔少港人成長～日前，電視台總經理（節目內容營運）嘅曾志偉宣佈將會重啟《獎門人》節目，引起網民熱議。7月3日，《開心無敵獎門人》就開始首集錄影，仲加入咗3位新「獎老」！

Photo from 娛樂新聞台

《獎門人》1995年開始播放

《獎門人》自1995年開始播放，推出過十輯遊戲節目，並由「獎門人」曾志偉以及「獎老」們主持，邀請嘉賓一齊玩遊戲贏獎品。第一輯嘅「獎老」只得林曉峰、陳小春（其後因工作檔期換上錢嘉樂），呢兩位都可以稱得上係元老級主持；其後亦有王祖藍、阮兆祥、金剛等加入成為「獎老」，主持班底越來越多人！

Photo from 《超級無敵獎門人》

曾志偉宣佈《獎門人》回歸！

早前，電視台總經理曾志偉喺55週年台慶宣佈《獎門人》回歸，揚言要為觀眾帶來歡樂！據悉，今輯一共推出63集，第一集暫定於7月31日推出，橫跨台慶前後，播足3個幾月，希望勾起香港人嘅童年回憶～

Photo from 娛樂新聞台

2位經典「獎老」超感慨：回憶返晒嚟！

3日，《開心無敵獎門人》舉行首次錄影，「獎門人」曾志偉帶同2位舊拍檔錢嘉樂、阮兆祥接受訪問，二人就非常「識做」咁話再度主持節目獲益良多，錢嘉樂表示「我好多嘢都係獎門人度攞返嚟㗎！我成個屋企都係佢度攞㗎！」；而阮兆祥就話玩返過往嘅經典遊戲，令佢回憶不停湧現有啲感動。

Photo from 娛樂新聞台

加入3位新主持人！

今輯《獎門人》將會有3位新「獎老」加入，包括有麥美恩、吳嘉儀及程浩駿。3位新主持都難掩興奮之情，麥美恩表示獲邀成為主持感到十分榮幸；而吳嘉儀就話「一聽到以為係拍緊整蠱節目。」而當日拍攝獲邀嘅嘉賓就有周嘉洛、陳瀅、連詩雅、張頴康及王灝兒（JW）等。

Photo from 娛樂新聞台

解釋重啟節目原因

而闊別主持「獎門人」長達10年嘅曾志偉都坦承有啲緊張，並介紹今次節目嘅亮點「我哋從當年175個遊戲揀大家最鍾意嘅出嚟重溫，暫時揀咗30幾個」，仲表示希望強調今次再次開播節目嘅原因，「成日俾途人問幾時開拍（獎門人），覺得係時候同大家重溫獎門人，最緊要係好多遊戲宜家嘅小朋友或者年輕人未睇過啦，俾佢哋開心下！」