日本「兒童房大叔／大嬸」成新標籤，冇女朋友／正職／畀家用，42歲大叔反駁外界批評：又冇麻煩到人！

By Wing Ws on 08 Feb 2023

Digital Content Writer

躺平、啃老族、廢青一類標籤大家都應該聽過，近日，日本又新出咗一個類近嘅族群名稱！「兒童房大叔」、「兒童房大嬸」最近成為日本社會議題，「兒童房」即家中由細住到大嘅房間，由於呢個族群嘅成年人到中、老年仍未搬出父母家／獨居，因此被日媒稱為「兒童房大叔／大嬸」，同時，呢類兒童房人士大多冇對象、冇畀家用、冇正職兼收入較低，令外界關注呢類人士嘅父母、兄弟姊妹嘅問題，雖然收入唔多，但亦有兒童房大叔／大嬸表示對自己「躺平」般嘅生活感到滿意。

Photo from 《EXIT：極限逃生》劇照

日本八卦雜誌《週刊SPA！》近日訪問一名42歲男性倉田正則，即使已經年過40，倉田仍住喺從小成長嘅房間﹐未試過獨居，係近年俗稱嘅「兒童房大叔」。不過，倉田對此並無負面感受，更稱自己係「享受兒童房大叔」嘅狀態。

Photo from 日刊SPA 網站

唔想搵正職

倉田係家中末子，有兩位大7年及3年嘅姐姐，兩位姐姐高中畢業後就搬出去住，開始自己嘅生活，現時已經結婚、育有2子，同樣就讀專業知識高中嘅倉田畢業後未有好似身邊嘅人咁開始搵工，佢表示自己冇咩特別想做嘅嘢，睇咗每間公司嘅工作方式及薪資制度後，就覺得對正職冇咩興趣，而當時父母對佢嘅態度係畢到業就得，未有太多強求。

Photo from 日刊SPA 網站

月入8000蚊都儲到錢

高中畢業後，倉田未有升學，約有數個月未有工作嘅佢，靠過年收嘅利是錢過日子，直到積蓄用盡，佢開始做即日出糧嘅臨時工，一做就做咗24年。倉田嘅平均月收入係13萬日元（約港幣8000元），主要用喺遊戲課金或外出用膳，間唔中會請外甥或親戚小朋友食嘢。因為住喺父母屋企，所以唔使畀房租，雖然父母年紀大，但兩人均有年金及打工，所以冇要求畀食飯錢或水電媒，手機費都係父母畀埋嘅家庭plan，倉田表示：「如果嗰個月課金用多咗錢，會『多少地按感受』畀返啲錢。」雖然收入唔多，但倉田都儲到錢，佢表示自己一個月最多用剩3萬日元（約港幣1800元），係餘額當儲蓄嘅概念：「我冇檢查過，但（儲蓄）應該有200萬日元（約港幣12萬元）。」倉田表示，有時唔舒服冇返工，會留喺屋企打機，休閑咁度過。

Photo from 日刊SPA 網站

父母對自己冇期望／擔心

即使冇正式嘅工作，倉田同屋企人嘅關係冇因此而受影響，父母性格隨和，對個仔嘅為人瞭如指掌，亦始終未有催結婚或迫佢出去闖蕩，反而更多嘅係鄰居嘅閑言雜語。可能係兩個姐姐都已婚生子，倉田媽媽都經常被問個仔「係咪仲住喺屋企」、「有冇女朋友」，而媽媽都會笑住答：「同其他人無關。」倉田表示，自己學習平平，即使曾經同鍾意嘅人交往，自己對拍拖都冇咩興趣。由於成個月唔返工嘅日子實在太得閑，所以先會選擇呢種間唔中工作嘅模式，亦從未覺得收工太少。倉田嘅興趣係打機，但唔會因為課金而借錢。佢認為：「我覺得父母對我並無任何期待或擔心。」

Photo from 日刊SPA 網站

對外界評價感不忿：又冇麻煩到人

當倉田同朋友分享自己嘅生活方式時，會收到對方「振作啲！」、「咁樣會好危險！」嘅囑咐，不過佢本人就唔太在意。但有一日，倉田睇電視嘅時候，聽到「兒童房大叔」、「兒童房大嬸」嘅報道，先意識到係講緊自己，仲俾人改咗個咁嘅名。新聞中更出現「永遠無法自立」、「唔好揀做交往對象」、「非常羞愧嘅存在」等字句，咁耐以嚟一直維持呢種生活方式嘅倉田第一次了解到大眾點樣評價自己，令佢有啲不忿：「我有咁麻煩到人？我只係唔想結婚或搵正職，並住喺父母屋企，而且我嘅屋企人都唔覺得住兒童房嘅我有問題。雖然屋企並唔富裕，但父母都有為自己嘅退休生活做好準備，會幫我畀保險金及年金，我唔覺得困擾。佢哋仲會同我講：『可以留喺屋企，仲會同啲孫相處得咁好，多謝你』。」自覺身在福中嘅倉田指：「我淨係想畀大家知道，我冇麻煩屋企人，而且過得好好。如果係要逼『兒童房大叔』離家就職，話唔定會因為壓力而成為犯罪者。當然，我都知道呢種生活方式唔值得稱讚，所以唔會鼓勵任何人，亦都應該得我屋企會畀我咁做。」