梁文禮被停工3個月引議！網民斥商台私事公辦：艾粒係高層所以唔使罰？

By Wing Ws on 27 Feb 2023

Digital Content Writer

商台DJ梁文禮早前於公開及私人Facebook帳戶分別大讚及批評梁詠琪演唱會一事，被網民批評為「雙面人」，其後，網民再挖出梁文禮曾鬧爆陳奕迅及MIRROR成員嘅帖文，事件鬧得滿城皆知。今日（27日），商台於社文媒體上發佈一則聲明，指所屬商台主持人梁文禮「近日於社交平台對個別音樂人發出帶有傷害性之評論」，因此在商台負責人與梁文禮共同檢討後，決定於今日起停工3個月，稱「待冷靜反思過後再重新出發」。但帖文卻引起網民一面倒負評，認為商台未有公平處罰艾粒，又質疑其做法只係唔想得罪ViuTV及MIRROR fans。

Photo from 梁文禮 IG

網民不滿商台做法，改撐梁文禮

雖然商台就梁文禮一事作出處理，但網民就唔buy，不滿商台只懲戒DJ梁文禮，未有用同樣方式處置艾粒：「艾粒單野仲嚴重過佢呢單野喎！點解只係懲罰啲細？！」、「艾粒先係最需要停職果個」、「大細超，艾粒又冇事？」、「如果903認為自己係『嚴正執法』，就唔該你一視同仁，處理埋艾粒」，又認為艾粒多年開騷「職場欺凌」兼「性取向歧視」商台DJ余迪偉更加過分。反之，梁文禮僅在私人帳號上發表言論，卻因此用作公事懲罰，令網民嬲爆：「放左工點解唔可以有言論自由」、「職場性向歧視就無問題，私人ac講野就要停職咁誇張」、「私人言論，都被逼到道歉。好癲，唔可以有個人感受!？」、「迪偉好慘！」。同時，有網民出言表示撐梁文禮。

Photo from 余迪偉 FB

Photo from my903.com 商業電台 FB

艾粒係高層唔使被罰？

對於商台「大細超」做法，留言區一面倒負評，更有網民指出艾粒同梁文禮職位唔同，稱當奴係「節目副總監」，少爺占係「音樂總監」，而梁文禮就係低少少「助理音樂總監」，引起網民熱議：「明哂。高層大L哂」、「高層好巴閉喎係唔同d嘅」，認為艾粒職位較高，因此商台未有處罰二人。

Photo from my903.com 商業電台 FB

fans曾聯署要求罷免梁文禮

除咗歌手梁詠琪，梁文禮其後被挖出曾於私人帳號中批評其他藝人，如批評陳奕迅「黑面唱歌，唱到發脾氣」，又疑暗指MIRROR成員嘅翻唱作品係「集體強姦張國榮作品」。相關言論引起有關藝人嘅fans不滿，有網民發現fans發起聯署，要求商台罷免DJ梁文禮，否則，會「考慮罷聽CR/罷看叱咤樂壇流行榜頒獎典禮」。相關做法令網民質疑商台事實上只係「唔想得罪ViuTV」及鏡粉。