內地客控訴空服員歧視非英語乘客，笑人毛毯講做Carpet，國泰二度致歉網民仍唔buy
近日，有內地網民於社交平台上發帖，控訴國泰航空公司嘅空中服務員歧視非英語乘客，並貼出有關錄音，有關帖文引起網民熱議，紛紛到航空公司嘅社交平台上留言炮轟，而國泰航空今日（23日）發聲明回應，但仍有大批網民感到不滿，事件仍不斷發酵。
Photo from 《衝上雲霄》劇集截圖
昨日（22日），一名內地網民於「小紅書」以「舉報國泰航空後艙空乘歧視非英語乘客」為題發帖，表示自己於前日（21日）搭乘國泰航空CX987航班，由成都飛往香港，選擇後排座位，離空中服務員準備餐食及休息處較近，佢表示：「選座為最後一排75K，沒想到是通向人性醜惡的前排門票」。樓主指，自己一坐低就聽到空服員不斷用英語、粵語抱怨，稱：「If you cannot speak blanket, you cannot have it」（如果他們不會說毛毯的英文，那他們就不配毛毯）、「Carpet is on the floor」（地毯是在地上），樓主猜測係前排嘅乘客努力用自己識嘅英文單詞「Carpet（地毯）」，詢問空服員攞「Blanket（毛毯）」，但最終被取笑。而樓主附近嘅乘客都嘗試用英文詢問點填寫入境卡，但「得到的也是無比不耐煩的回應」。
Photo from 「小紅薯 62755FCA」小紅書
另外，有位老人喺起飛後冇幾耐就抱住小朋友去廁所，空姐用粵語廣播：「安全信號燈還未熄滅，請回到座位」，樓主指：「老人離位是不對，沒有遵守安全信號」，但卻聽到空姐轉頭用粵語對同事講：「他們聽不懂人話啦」。而成程2個半鐘嘅航班，空服員「對旅客的侮辱言語以及陰陽怪氣」就講足咁耐。
Photo from 《衝上雲霄2》劇集截圖
樓主對此感到氣憤：「我真的很不理解，為什麼對不講英文不講粵語的乘客有這麼大的惡意。不要求額外熱心的服務，請問為什麼對旅客基本的尊重都做不到。」並tag國泰航空嘅官方帳號：「請問這就是你們培訓的員工素質？」同時，該名內地乘客指，已於下機前對乘務長說明情況，並通知佢會正式投訴。同時，樓主於社交平台上提出要求3位涉事空服員就歧視言論公開道歉，以及國泰航空向「帖子下面有過不愉快經歷的乘客們」致歉。
Photo from 「小紅薯 62755FCA」小紅書
帖文引起熱議，唔少網民留言分享同類經歷，指同樣遭遇過無禮對待，更有大批網民於國泰社文平台下留言炮轟，嘲笑國泰航空公司「CATHAY PACIFIC」為「CARPET PACIFIC」。
Photo from 「國泰航空」小紅書
昨晚，國泰航空於最新帖文中致歉，但留言區仍有唔少人感到不滿，國泰再於今日下午於小紅書及微博發聲明道歉，指已第一時間聯絡有關乘客，進一步了解情況，並暫停有關空服員嘅「飛行任務」，展開內部調查，於3日內公布處理結果。但大多網民唔buy，要求官方除咗小紅書、微博以外，於其他社交平台Instagram、Facebook、Twitter等亦發布道歉聲明。
Photo from 國泰航空 小紅書
Photo from 國泰航空 微博
Photo from 國泰航空 小紅書
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
要有同理心！空姐分享5種乘客搭飛機嘅超討厭行為～原來唔止得將座位變成垃圾場！
1 Sep 2017
熱愛旅遊嘅小編，曾經一個月飛4-5個國家旅行～以前成日飛嘅小編，難免會成日係飛機上遇到一D討厭嘅乘客行為 ，令旅程一開始就破壞自己美好嘅心情。今日小編就想係度分享空姐最討厭嘅5大乘客行為(連passengershaming都記錄過）！你又係唔係其中一個呢！？
01 | 赤腳最舒服，臭味傳千里
飛機take off之後，氣壓自然會大幅增大，腳部亦會輕微腫脹！好多人想自己舒服D，就會將對鞋襪除掉，但呢種行為，係小編睇嚟係將自己嘅快樂建築於別人嘅痛苦之上。有時望住幾好食嘅飛機餐，聞到陣味都即刻食唔落。
小編建議： 如果遇到呢D情況，大家可按鈴麻煩空中服務員解決，佢地好多時會擺咖啡包係附近坐位，僻下味～都幾work 嫁～聞咖啡好過聞腳臭味啦！
02 | 一人霸三個位，絕對值回票價
大家買好咗機票，登機前地勤人員都會幫大家劃好位，列印係登機證上，方便每個乘客容易搵到屬於佢地自己嘅位置。但係好多乘客都會抱住‘先到先得’嘅心態，唔理個位係咪自己嘅就會坐住先！有時見到格離冇人，仲會霸埋其他人個位！小編都好明白，特別係搭long haul機個時，經濟艙真係會坐得好辛苦！但唔好一開波就霸三個位，仲要阻住其他人boarding～
小編建議： 大家可以等飛機起飛一段時間後，confirm格離真係冇人坐先再調位。咁就唔會阻住空中服務員一開始boarding啦，大家都可以快D起飛～
03| 座位變垃圾場
唔知大家有冇發現離開時，見過一D客人嘅座位好似打完仗一樣？你已經到達目的地，所以影響不大，但係有冇諗過負責清潔嘅機組人員會有幾慘？而且亦有可能會影響下一位使用者。
小編建議：大家唔好將機艙當係自己屋企。再講，就算係自己屋企都唔亂拋垃圾啦！大家搭飛機個時，真係要有D同理心～
04 | 行李亂放沒公德！
座位上嘅行李櫃本來空間就唔大，但總有D人會較自我，將行李亂放。亂放唔單止會造成其他乘客不便，遇上氣流時，行李箱更有機會跌落嚟，造成傷亡。
小編建議：自己嘅行李自己負責，有時行李櫃空間唔大，自己細細嘅袋仔可以擺係坐位前面！最重要係：空姐空少唔係你地嘅工人，唔好叫佢地幫你擺行李！要諗下，佢地分分鍾仲細隻過你地～
05| 廁所變戰場，叫下一手如何使用！
有D人一去洗手間，會覺得唔係自己屋企，用完就會完全唔理會下一個使用者。小編就見過成個洗手間都係紙巾，鋪完廁所板都應該自己搞掂D紙巾佢。有時仲會好多黃色液體～真係好嘔心～
Photo from Pinterest
小編建議：深明廁所一關上門，大家都唔知會係入面做咩事！但如廁後，基本嘅衛生意識都要有！廁所唔係得你一個人用，要有同理心呀！
大家睇完，覺唔覺得自己係一個令人討厭嘅乘客呢！？只要多D同理心，唔好覺得自己係客高高在上，咁就會為空中服務員帶少好多麻煩啦～
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
