微辣阿丞晒對話力證清白與阿晶關係良好！霍哥、阿泰宣佈離開微辣

By Jennifer on 31 Jul 2023

Digital Editor

今晚食乜餸：小二，嚟一碟花生！

阿晶離世後，多位微辣藝人都備受網民批評。其中少年江流阿丞就喺IG公開與阿晶嘅對話，力證自己之前一直有關心阿晶，所謂嘅喊喊filter亦係被卡特拍攝，佢由始至終都唔知filter嘅用意。另外霍哥、阿泰亦正式宣佈已經離開微辣。

阿晶離世，喊喊filter成微辣眾人欺凌證據？！

微辣前經理人阿晶（Jane）輕生離世震驚港澳，由於阿晶離世前喺IG公開千字文，力斥微辣一眾員工嘅行為令佢飽受haters攻擊，佢輕生後網民紛紛指微辣員工集體欺凌阿晶，令佢情緒受到困擾。尤其係喺阿晶稱離職時老闆六毫子有喊住挽留佢，之後微辣旗下藝人齊齊喺IG上載喊喊filter，疑似暗寸阿晶。

思男稱唔知道喊喊filter意思

因此曾上傳過喊喊filter嘅微辣員工，全都被視為有份欺凌阿晶。其中思男喺阿晶離世後不久就於IG開live，表示自己雖然用咗喊喊filter，但其實唔知道有咩意思，只係見到人哋用佢先跟住用，否認自己有欺凌阿晶，但網友對佢嘅解釋並不受落。

阿丞晒對話紀錄證與阿晶係抑鬱症病友

之後又有唔少微辣藝人都喺IG刪除「微辣」嘅tag及工作聯絡，似乎要同微辣劃清界線！其中一個刪走「微辣」嘅少年江流阿丞就喺IG公開佢同阿晶嘅對話截圖，揭佢同阿晶係抑鬱症病友，兩人更會互相關心、互相分享藥物同書籍、調整心態嘅方法。

澄清未曾欺凌過阿晶，喊喊filter亦非本人所拍

阿丞表示佢因為抑鬱症喺2022年年初提出咗辭去編劇職務，佢澄清自己由始至終從未欺凌過阿晶：「網上一直流傳的那個喊喊filter不是我本人拍的，那個story更不是本人賬戶。公司同事經常分享日常，當時我被拍，以為對方是在玩便沒有多理會。」翻睇有關嘅story，阿丞喊喊filter嘅post係出自卡特IG，的確唔係阿丞主動拍攝及上傳。

阿丞IG全文：
時間已經不知不覺間過了五日，我仍未接受阿晶離開這個事實。

在感情世界我是個妄自菲薄的人，我與阿晶也許不是知心朋友，彼此間來往也沒有其他人那麼密，但我們有層特別關係，我們都是病友。

在20年年尾，我情緒開始失控，甚至會傷害自己，我不敢告訴任何人，包括我的太太。後來我決定去醫院檢查，結果是我患有抑鬱症，需要食藥進行長期治療。我不敢向任何人透露自己的病況，因為我恐懼他人的異樣眼光。那時得知阿晶也患有抑鬱症，我便有意向她提及相關話題，最終也和她袒露我的病情。

有一次在公司萬聖節，在人群中我突然感到窒息，迅速離開了現場，當時身邊沒有藥物，經過海邊時便有跳下去的衝動。我在無助時問了阿晶，她教了我呼吸法，就是讓急促的呼吸慢慢調整，直至狀態恢復正常。就這樣，我和阿晶兩人成為了病友關係。

那一次在Manner Club聊起了阿晶的抑鬱症時，她忍不住失聲痛哭，我在一旁完全深有體會，抑鬱症的存在如此霸道，又如此無常，當它來臨時我們甚至無法獲得身邊人的理解。我們很清楚，人們都討厭散發負能量的人，大多數人都不願相信人的精神是會生病的，為了在這社會生存下去，我們都不得不偽裝成一個「正常人」。

我心底裡十分佩服阿晶的勇敢，向世人坦誠自己的病從來不是一件容易的事，過程中心裡必然經過了無數的掙扎，而且說了出來難免有很多不被理解的難聽聲音。曾經，我在笑林寺最後一集提過血清素，這是一個只有我和阿晶get到的gag，血清素是我們「續命」的重要藥物。這是我唯一一次向觀眾透露我的病，而我也只敢用講笑話方式來說。

我們平時不多聯繫，但會時不時問候病況，會互相分享藥物和書籍，亦或者調整心態的方法。我們從不問對方發生什麼事，因為往往發病都是毫無預兆地，身體會莫名感受到不安，亦會感覺自己隨時會失控，無力控制自己。正是這樣的痛苦，交流對抗發病的方法對我們而言更加有用。

後來發生了很多事，她也離開了微辣。離開微辣之後，我們雖然聯繫少了，但仍然保持著良好關係。而我在21年年底發病跡象逐漸嚴重，工作和面對網絡的壓力讓我無法工作，我已經失去對生活的掌控。於是在22年年初我提出了辭去編劇職務，本質上想給自己放一個假調整狀態，用漫長時間慢慢康復。

網上一直流傳的那個喊喊filter不是我本人拍的，那個story更不是本人賬戶。公司同事經常分享日常，當時我被拍，以為對方是在玩便沒有多理會，當時被網友cap圖，後來發出來才明白造成如此嚴重的誤會，但我由始至終從未欺凌過阿晶，我們一直都保持朋友關係。

這些話，不是想拿抑鬱症作免死金牌。在你們眼中，我是其中一朵「雪花」，在我心裡，我的確後悔，如果我當時能多關心一下阿晶，多問她一下，會否結果能有不同？

這段時間，每日收到上百條謾罵留言，我一直沒有選擇回應，在此向關心晶的粉絲、朋友講一聲抱歉。一方面我沒有勇氣袒露自己的病，另一方面我完全失去了氣力來回應這一切。但我已經逃避太久了，一味地逃避只會令自己陷入更痛苦的境地。阿晶說過，抑鬱症真正對抗的方法是面對，正視它的存在。

任何難聽的說話我也不會刪除，因為我相信我能撐下去。

阿晶，最後要和你說聲對唔住，作為朋友、作為病友，我卻忘記了關懷。

願天國不再發病，不再遭受異樣眼光，不再那麼厭惡自己，不再見到血清素，不再難過。

霍哥宣佈正式離開微辣

唔少網民都表示相信阿丞的確無hurt過阿晶，又指希望佢唔會受呢次事件影響。另外霍哥亦證實已經正式離開微辣：「一直以來感謝大家的幫助及支持。這段時間看到大家為這件事費心費神，真的十分抱歉。」佢指暫時未知日後去向。

阿泰怒斥網民被狠批

同期宣佈離開微辣嘅仲有阿泰：「已離開微辣，對公司失望，對網絡失望，對全世界失望。」但相比起霍哥，網民明顯唔接受佢嘅講法：「幾日前先講完無悔入微辣，感恩各位大佬」、「微辣係靠網絡起家，賺到錢搵到食時，又唔見妳話對網絡失望」

阿泰IG全文：
由今日起IG Youtube
再無阿泰呢個人
我唔需要阿泰呢個名東山再起
我受夠呢到一切

我冇料玩落去七情六慾放上面
有咩講咩嘅人真係唔適合玩呢個圈
毀三關既野日日發生
早半年起我情緒都日日爆發邊緣
呢兩個月朋友陸續開始叫我睇病
驚我會變咗下一個Jane
呢個唔係一個兢兢業業嘅工作
一切都係講命
我後悔點解唔早啲傾解約

Jane出事前
好感謝朋友觀眾叫我向前望
但向前望有啲乜嘢喺度
我已經鬧曬全世界
朋友到老細逐個打電話屌

Jane出事後
朋友們比人X 睇住身邊人喊
又氹唔倒任何人笑起身
我幫唔倒
一個都幫唔到
只能無能狂怒
你哋真係認為所有人都抵死？
口口聲聲留言話知道真相嘅人
我問吓你哋估吓邊個俾人鬧得最犀利嘅
仲係Jane生前既密友？
可能真係有人抵死但我諗唔係全部掛

最好笑係乜嘢
你哋嘅所謂正義
只會先死一班打份牛工養家既人
再死一班三觀正確既人

偽人真係講得啱呀
要扮到好好睇睇我唔識扮啦唔好意思
我唔玩呀家下由嗰啲扮得好既繼續

同翻前兩日叫停阿妹直播後黎我到嘈既人講聲
對唔住
我衝動同你哋對X
但如果俾個機會我我一樣會咁做
Jane已經係一個受害者
我唔會比你地有機會逼死多個

呢個時候出聲實俾人X 預左
要X就X 公司唔頂我頂
你班網絡判官
我家下開放翻留言任砌唔嬲
比多個獎勵你哋上面詳細我寫埋落遺書度
X得死既有獎公開
義正嚴辭留言自以為正義既人等下
到時再重新審視下
係「聲討」定係「網暴」吧法官們

唔講了再見網絡等實名網絡出現再會
如果時間可以重來
我會選擇冇入過微辣
冇掂過網絡呢行

相關文章：阿晶離世，與微辣鬧翻時間線一覽！思男急解釋用filter原因