何超儀親述陳子聰近況！大動脈爆裂險截肢，為老公暖腳令Do姐感動
Do姐YouTube節目《The Do Show》邀請咗何超儀分享佢老公陳子聰嘅身體健康近況，原來佢當日大動脈爆裂，昏迷多日，差啲要截肢。而何超儀為老公奔波，停工專心照顧陳子聰亦令網民大為感動！
何超儀表示佢希望上Do姐呢個節目向大眾宣傳陳子聰所患嘅病。Do姐問早年陳子聰暴瘦，外界擔心佢有健康問題，何超儀就指2016年時陳子聰患上肝硬化同直腸炎，但好快就痊癒。
康復後陳子聰自覺狀態唔錯，開始做運動、戒煙。何超儀表示：「但已經太遲。」佢指老公以前係「煙鏟」，唔理有無食煙都會點著枝煙，仲要話極都唔聽。何超儀指陳子聰2016年患病時醫生已同佢講要食齋、唔準食咖啡因、唔準食煙、中國茶都唔飲得。
何超儀指老公停食煙3個月後就故態復萌，又開始叫司機幫佢買漢堡、pizza等肥膩食物。直到2022年10月5日陳子聰飛澳洲探親，佢家人唔知道醫囑，同佢食咗好多蝦餃、又幫屋企人搬重物。之後就出現全物無力嘅徵狀，活動範圍只限喺佢自己間房。
何超儀指佢每晚同老公facetime都見對方瞓喺張床，見老公狀態咁差，叫佢返香港快啲睇醫生。佢指見老公面色好差，面灰灰，又有其他唔同顏色。何超儀回憶指到佢出席釜山電影節當日，老公就出事。嗰日老公唔知點解要載一個人去急症室，由於陳子聰本身有三高，又面臨載人入急症嘅重大壓力，喺載人途中陳子聰覺得個肚好痛，到達醫院時就暈倒。
檢查6個鐘後發現陳子聰肚臍以下嘅動脈已爆裂，肚痛係因為「一肚都係血」，喺做手術前終打電話通知何超儀，何超儀即時放下手頭工作，飛到澳洲。佢表示醫生向佢解釋咗好多次，又畫埋圖但佢都唔太理解到，之後何超儀就上網查資料，知道係大動脈爆裂咗。
Do姐問呢個病係咪好少見，何超儀就指人口老化將會變得常見，常吸煙飲酒、食肥膩嘢、三高、壓力大嘅人都有機會患上。佢指老公為家人換king size床褥超出佢嘅能力，終令動脈破裂。
何超儀指手術十分大工程，因為一肚係血，所以要將內臟「拎晒出嚟」，何超儀指醫生形容陳子聰條大動脈：「爛晒！」要即時切除，換成人工造嘅矽膠。何超儀指手術中整壞咗陳子聰嘅尿道、腎臟出現問題等，術後肚脹如懷孕9個月，而且身體仲有其他問題，所以唔縫合，先用醫療保鮮紙包住個肚。
連續做咗4日手術後，陳子聰身體仍連住多部機器，更有好多黑血流出。醫生指係喺佢身體多年嘅黑血，係無用嘅，每日要輸十幾包血畀佢。何超儀表示陳子聰頭一個星期昏迷情況十分危險，醫生能做嘅都做咗，只能靠病人意志。
何超儀指陳子聰啲腳趾變晒紫色，佢打畀香港嘅醫生，對方話會當成糖尿腳險截肢！為咗幫老公暖腳，何超儀每日食超多嘢食、著好多年保暖衣、貼暖包保持身體溫暖，抱住老公隻腳同關節位，希望可以令佢身體回暖。
何超儀指陳子聰昏迷咗一個月零一個星期，期間佢經常氹老公唔好郁手模鼻喉、鼓勵佢要加油。陳子聰醒後醫生都指佢可能要一世洗腎同插管排便。何超儀指佢每日都用「BB話」鼓勵老公、氹老公，喺當地逗留咗2個月後就返香港。何超儀搵咗全球排名第一嘅醫院為老公醫病，現時陳子聰休養中，待10個月後再做手術。
何超儀同老公陳子聰喺澳洲度過咗19週年結婚紀念日，Do姐問佢有無喊過，何超儀表示有喺房喊過，但為免感冒帶病菌入醫院影響老公，佢都盡量保持冷靜。之後佢就搵國際醫療專機載陳子聰返香港，佢指現時老公狀況好返好多。
現時陳子聰仍要掛袋排大小二便，何超儀表示自己最大心願係希望老公做返「free man」同正常人一樣，所以會繼續同老公做手術希望可以自主排便。何超儀表示今年盡量唔接戲，就算要出埠，唔可以多過3、4日就要返屋企照顧老公。節目最後超儀亦打電話畀陳子聰，佢表示見到太太為佢奔波勞碌，十分感動！
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
