西環可愛cafe呈獻～法國生蠔High Tea Set! 仲有夢幻棉花糖甜品同星空飲品添～

By 123testing on 06 Oct 2017

喺尖沙咀同西環都有分店嘅「L'attitude」以唔同造型嘅棉花糖雪糕甜品為著名，有唔少女生都有去過試佢地嘅甜品，而佢地西環分店推出嘅Afternoon High Tea Set造型同樣亮麗，仲要以法國新鮮生蠔為主打，咁吸引點可以唔去試下呢～

位於西環嘅「L'attitude」分店，離遠見到餐廳門口嘅可愛裝飾，就知道係走可愛路線，而且餐廳以棉花糖雪糕為著名，所以成為左唔少女仔朋友聚會嘅地點。餐廳門使用全玻璃設計，透光度十足，感覺簡潔舒適。入口處上面有兩隻立體店鋪主題公仔做裝飾歡迎客人，好得意～

Photo from Presslogic

餐廳內好多角落都見到「L'attitude」主題公仔「Lattbuddies」嘅身影，包括有個巨型公仔擺設俾客人合照、可愛公仔造型嘅攬枕以及牆上嘅裝飾，盡顯少女情懷呢～

Photo from Presslogic

為配合餐廳一路以黎主打嘅棉花糖雪糕甜品，店內都掛滿一舊舊雲型嘅吊燈，讓客人有如在雲層下享受美食一樣嘅感覺。

Photo from Presslogic

佢地嘅棉花糖雪糕甜品相信大家都唔陌生，所以今次要介紹嘅係佢地嘅Afternoon High Tea Set，只有西環分店有得供應架～
High Tea Set係一個用銀色雀籠造型盛載，一共三層，以法國生蠔為主打，望落充滿優雅氣息而且好豐富。

Photo from Presslogic

第一層有4隻法國新鮮生蠔，好新鮮，所以沾點一啲檸檬汁已經好好味。好少有high tea set有新鮮生蠔食，所以鍾意食生蠔嘅朋友一定要黎試下！
旁邊嘅係明太子飄香涼伴烏冬，明太子份量好多，沾滿每一條口感彈牙嘅烏冬，再配合埋胡麻醬，一流嘅滋味組合。

Photo from Presslogic

第二層有牛油果蟹籽芝麻反卷、牛油果蝦肉沙律、鵝肝多士黑醋汁配三文魚籽及法式馬卡龍。

Photo from Presslogic

牛油果蟹籽芝麻反卷好香，夾著中間的牛油果配料，好清新。
牛油果蝦肉沙律入面有好多牛油果，口感極creamy，面頭嘅蝦肉亦好爽甜，每一口滿滿嘅牛油果真係會令牛油果控嘅朋友感覺好滿足～

Photo from Presslogic

鵝肝多士黑醋汁配三文魚籽係香脆嘅多士上面放左煎香嘅鵝肝，鵝肝的油香融化在口中，搭配埋卜脆嘅三文魚籽提昇了整體鹹香味。

Photo from Presslogic

第三層以炸物為主，有日式煎餃子、脆炸軟殻蟹及重慶麻辣炸雞翼。另外附送燒汁同牛油果醬，俾客人自由沾點搭配炸物食用。

Photo from Presslogic

日式煎餃子味道好香，即使後期食嘅時候熱度稍為減退都無影響味道，點燒汁唔錯。
重慶麻辣炸雞翼嘅雞翼好香口，而且係帶微微麻口嘅過癮辣味。
脆炸軟殻蟹脆身，配牛油果醬幾特別幾夾～

Photo from Presslogic

小編覺得「L'attitude」呢個平時Afternoon High Tea Set幾有新鮮感，因為出面好多都係甜點佔大部份，而呢個係鹹點較多，而食物嘅配搭同味道都唔錯，值得一試。

個high tea set附送茶或咖啡，如果想特別啲，可以選擇加錢試下佢地嘅新推出星空百香果特飲及星空奇異果特飲。兩款飲落都好清新、好解渴之餘，仲好靚！漸層星空效果配埋發光冰粒裝置，好夢幻呀～
星空百香果特飲

Photo from Presslogic

星空奇異果特飲

Photo from Presslogic

食完tea set唔夠，又或者想再坐耐啲同朋友傾下計，可以叫多個甜品～呢度嘅甜品款式好多，每樣都好吸引。
櫻花樹下
好有意境嘅甜品名，一大個粉紅色棉花糖雲，底下係牛奶味雪糕。碟上嘅係朱古力心太軟，朱古力味道香濃。餐廳建議嘅食法係先吃掉一半棉花糖，再把剩餘一半混合軟雪糕及草莓粉一齊食，會有兩種不道享受。