錦麗新系列米紙卷登場！綠豆崩大碗～健康之選！

錦麗曾被國際媒體Wall Street Journal譽為越南胡志明市最好食嘅牛肉粉，擁有近50年歷史，之前係觀塘apm開設首間海外分店，上兩個月更登陸九龍灣德福廣場，開第二間分店！新分店仲推出全新米紙卷，凍綠豆崩大碗，吸引唔少健康人士、上班一族！

講求健康嘅朋友又多一個新嘅食物選擇，大家可以試下錦麗德福廣場分店，推出嘅全新米紙卷高纖蔬菜系列，包括牛油果沙律菜米紙卷同魚香芒果米紙卷。
Photo from PressLogic

前者清清地，加上牛油果，有助腸道蠕動，又可降低膽固醇，穩定血糖水平，簡直係健康之選，減肥唔一定只係食沙律架！
Photo from PressLogic

小編就推薦魚香芒果米紙卷，除左有好fresh嘅芒果肉，仲有酥炸鱸魚粒，加上柔軟又煙韌嘅米紙卷，令口感更豐富之餘，米紙卷嘅鮮味又提升埋！
Photo from PressLogic

除左高纖系列，仲有最多人揀嘅大蝦扎肉米紙卷，相比起觀塘分店會粗身一D。蝦大隻彈牙，加配扎肉，配埋自家製魚露汁，酸酸甜甜，勁開胃！
Photo from PressLogic

仲有燒豬肉米紙卷，燒左豬肉加上米紙卷其他配料，好野味呀！食肉獸朋友不妨試下。

除左米紙卷，錦麗綜合粉都好出名，入面有澳洲肉眼生牛肉、本地熟牛肉同牛丸，加上每日以牛骨、牛坑腩、八角、桂皮、老薑等食材慢火熬8個鐘出黎嘅湯底，真係食落每一啖都有牛肉香呀！
Photo from PressLogic

而且佢地每一碗粉都會附送一杯香料同配菜，唔夠可以免費添加，比客人跟住食法食。先趁熱飲一啖湯，品嚐下濃郁嘅牛湯味，之後將九層塔、鵝蒂等香葉撕碎放入湯中，再加入青檸汁、辣椒同芽菜拌勻，最後就可以粉連湯一齊食，令每一啖都充滿濃濃嘅牛湯精華。想試下新野嘅朋友，可以試下越南地道食法，落埋「是拉差辣醬」同甜醬，仲有風味呀！
Photo from PressLogic

飲品方面，德福分店推出綠豆崩大碗。崩大碗係亞熱帶植物，係越南多數用於飲品上，可以解毒消腫、清熱生津，非常健康！今次加入綠豆沙，令客人更加體驗到越南風味！
Photo from PressLogic

最後當然要介紹一下錦麗好出名嘅越南滴漏咖啡，有熱有凍，等濃郁嘅咖啡一滴一滴漏出黎，之後再攪拌，將咖啡同奶融合，就可以飲啦，真係好香滑幼滑呀！
Photo from PressLogic

錦麗
地址：九龍灣偉業街33號德福廣場1期F29號舖 (部份介紹食品只於九龍灣分店有)
觀塘觀塘道418號創紀之城5期(apm)4樓19號舖
電話號碼：28119078
營業時間：星期一至日11:30-23:00

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載