躲進迷你北極冰屋嘆個冬日下午茶～超可愛愛斯基摩冰屋模型 鹹點超出色～無敵鬆餅又出現了！

聖誕節放假唔知有咩做？有無人成日都FF自己去左北極嘅冰屋去搵聖誕老人啊？係寒天雪地下可以呢埋係個暖意洋溢嘅冰屋入面，嘩！呢個感覺真係好幸福啊～MO Bar就整左個迷你冰屋，上面仲裝住大家好鍾意嘅茶點比大家係香港都可以感受到呢份幸福！快啲拉埋朋友一齊去呢個冰屋仔避一避世嘆番個tea先啦！

Photo from Presslogic

MO Bar嘅下午茶總係有吸引我去嘅理由～以見盡心思黎形容真係貼切到不能再貼切！

Photo from Presslogic
每樣茶點都整到超有聖誕同冬日嘅節日氣氛啊～見到一定好鍾意！而且小編拍心口保證佢地真係絕對唔係得個樣～坊間好多下午茶都好似得個靚字咁，但呢度真係又睇得又好食啊！

鹹點同甜點都各有五款嫁，就算係男仔都一定會鍾意食！

鹹點有煙三文魚及三文魚子薄脆酥、鵝肝慕絲配紅菜頭櫻桃啫喱、火雞三文治、法式南瓜芝士鹹批同堪察加蟹肉墨汁包～Photo from Presslogic

嘩嘩～呢個薄脆酥好有驚喜啊～三文魚子超新鮮爽彈就不在話下，個薄脆酥真係炸到超香脆～脆到咬開真係有咔咔聲！
Photo from Presslogic

而個鹹點聖誕樹真係好可愛，原來係應節嘅火雞三文治！火雞肉嫩滑加上青瓜真係好清爽好fresh啊！
Photo from Presslogic

鵝肝慕絲紅菜頭櫻桃啫喱會係濃濃鵝肝油香中滲出果香，去卻左鵝肝本身嘅油膩感！
Photo from Presslogic

堪察加蟹肉墨汁包更加係亮點，加左蟹肉沙律係中間，鮮甜爽口～再配上鬆軟嘅墨汁包真係Jengsssss～
Photo from Presslogic

如果大愛芝士同南瓜就一定對呢個鹹批愛不釋手！上面有香濃嘅芝士碎，而中間係濃郁帶軟綿口感嘅南瓜蓉～真係好好味啊！
Photo from Presslogic

之後就係甜點五款，包括有超討喜嘅雲呢拿雪人、椰子金莎朱古力、藍莓法式燉蛋杏仁撻、抹茶香檸聖誕樹同杏脯果仁鳥結糖蔥絲！
Photo from Presslogic

甜點外貌超可愛！重點介紹呢款抹茶香檸聖誕樹，聖誕樹外層蓋上濃濃抹茶，而咬開入面係超清新檸檬！令到唔會過份甜膩～
Photo from Presslogic

而呢個藍莓法式燉蛋杏仁撻更加係法式燉蛋嘅變奏版，加上藍莓，多左陣藍莓味之餘又食到燉蛋嘅蛋香，真係好好味啊！
Photo from Presslogic

最後當然唔少得呢個小編認為係全港最好食嘅英式鬆餅啦！依家仲期間限定推出岩哂冬天嘅香橙肉桂提子乾口味！Again，個鬆餅真係好無敵，我真係睇唔透點解可以焗到外層超香脆，帶濃濃嘅牛油香，簡直係有酥皮嘅感覺！而入面係好似蛋糕嘅鬆軟口感～食一啖你就會知咩叫幸福的鬆餅科科！
Photo from Presslogic

而新出限定嘅香橙肉桂提子乾口味真係好好味～可能小編真係太愛呢陣肉桂香味，簡直係昇華左個鬆餅香味，令到食落更加有層次！

最後仲可以試埋呢杯特式嘅冬日cocktail～分別係杏仁味同咖啡味濃濃嘅the white walker同埋超香椰子味嘅north pole snowfall，望到都覺得好冬天啊！Photo from Presslogic

係12月31號為左要歡渡佳節，MO Bar仲會係呢個除夕夜舉行「北極DJ派對」，客人係可以免費入場參加呢個party嫁～係晚上7點到10點仲可以享用北極主題小食同埋香檳～一齊黎MO Bar狂歡啦！

香港置地文華東方酒店 MO Bar
地址：中環皇后大道中15號置地文華東方酒店大堂
訂座電話：2132 0077

MO Bar「北極下午茶」
價錢：$796／2位用 (另加一服務費）
供應日期：即日起至2018年1月31日
時間：
星期一至五 15:00～17:30
星期六、日及公眾假期 14:30～18:00

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載