推介2018年冬季日劇《Unnatural》石原里美演技大突破！唔再演扮靚小惡魔 演有正義感女法醫

石原里美近年無論喺日本定香港都人氣急升，不過戲路都好似限制咗喺「小惡魔」、「扮靚」、「受歡迎靚女」等角色，但今季日劇由佢主演嘅《Unnatural》就好有睇頭，有別於佢平時接嘅戲，今次唔再扮靚，做一個實事求事又有正義感嘅法醫，而且編劇仲要係之前紅極一時嘅《逃避雖可恥但有用》編劇野木亞紀子。

Photo from TBS

故事係講述一間非自然死亡研究所，會有唔同嘅委託人委託呢到嘅法醫解剖屍體，希望從中搵出真正死因，係日劇嚟講相對少見唔係改編劇集，而係原創劇集～

今次石原呢個法醫角色唔再係賣萌，亦都唔再扮靚，而且要飾演出一個曾經喺全家燒炭案死裡逃生嘅女法醫，係需要紮實嘅演技先做到。

睇過石原之前嘅《失戀巧克力職人》、《校對女王》、《朝5晚9》等，都會發現當中有個共通點，就係角色都係個靚女，又或者好有時尚觸覺，仲需要到略帶誇張嘅演技。所以一直有部分人覺得佢演技一般。但今次《Unnatural》就打破咗呢啲想法，畀佢嘅演技好大嘅發展空間。

而劇情亦唔似一般劇集咁，講到主角係無敵咁，到最後一定會贏定點，又或者唔係警察又好似查晒案咁，而係真係由法醫角度出發，解剖屍體嘅知識。

當中仲有探討日本社會問題，例如話職業女性被歧視問題；黑心公司要人準時打卡再不斷OT，一層壓一層，用語言去施以壓力令員工覺得為職責、為唔辜負顧客期盼就一定要OT等。

但唔會話因為石原係主角，有主角光環就會到最後一定順佢意咁，而劇情都令人覺得好驚喜，每個角色都有佢地嘅秘密，會想一直睇落去，一步步揭曉佢地秘密背後嘅真相。

一直覺得石原里美係花樽嘅人，睇咗《Unnatural》會對佢有所改觀，甚至會成為佢嘅fans；而粉絲更加應該睇睇，因為會睇到唔一樣嘅石原里美～

Photo from horipro

圖片來源：TBS

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載