首爾航空7月開始會將A321機種列為固定航班，搭廉航去首爾就唔使逼得太緊啦～

香港人去韓國去得咁密，所以搭廉航都成為指定動作，其實去韓國嘅話都有唔少廉航選擇，當中作為新一代廉航嘅首爾航空都做咗唔少貼心改革，等大家可以舒舒服服咁坐去韓國血拼！

7月開始，首爾航空將會安排195座位嘅A321機作為來往首爾、香港嘅固定航班，呢架飛機同以往大家搭開嘅廉航有少少唔同，等小編同你找不同啦～

1.座位更闊

有D人唔鍾意搭廉航，其中一個好主要嘅原因係座位太窄，小不點們可能誤會覺得有問題，不過腿長嘅乘客就會好辛苦，幾個鐘頭屈住隻腳，會腳痹呀～～不過呢班機就改善咗呢個問題，座位有32吋闊，係廉航之中最闊㗎，基本上同坐普通航班差唔多（小編見到旁邊1.8以上嘅Oppa坐響位都依然有空位，完全唔會逼，正呀）！

2.獨立usb

每個座位上都會有一個usb充電口，呢個可以話係廉航嘅一大改革，以後可以充足電先落機，好貼心呀～

如果你有三腳插頭嘅話，座位下方都有一個插蘇位，充電就更加快。

3.有電視睇

同普通航班一樣，每個座位都有獨立嘅電視，可以睇番航班資料同固定嘅節目，不過日後電視程式會逐步更新，睇番官方facebook就知道幾時有娛樂節目睇喇～

小編過往搭廉航另一個覺得好唔舒服嘅點就係好焗好熱，今次小編試搭，覺得成個旅程空氣流通都幾好，起碼唔會訓到一半熱醒，如果你真係覺得太熱，仲可以調埋頭頂嘅小冷氣添！整體而言除咗無飛機餐之外，Airseoul其實同普通航班差唔多，對於平時搭飛機唔食飛機餐嘅朋友黎講，絕對係一樣好嘅選擇，仲有得掛衫添呀～

首爾航空航班資訊（每日）：

香港-》首爾 （RS532）  00:50（香港時間）-05:30（韓國時間）

首爾-》香港（RS531）   20:10（韓國時間）-22:50（香港時間）

首爾航空facebook:https://www.facebook.com/airseoulhk/

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載