入住台灣歐式夢幻莊園！十幾年古董傢俬成為真正城堡主人！

旅遊攻略美食推介台灣旅遊

By Jackie on 17 Jul 2018

Digital Editor

全職寫字，副業畫字，打算一輩子揸筆揾食，畫筆鉛筆雙兼得。「唔化妝襯衫唔出門症」末期患者，童真外表掩飾內心麻甩思想，夢想是在大學畢業後退休，顯然失敗。

北歐式嘅城堡，平時喺童話故事就見得多，有無諗過其實近到台灣都有！而且仲可以畀大家入住，無論出面定入面睇都超靚超豪華，唔講真係以為置身童話世界入面！單係影相打卡，相信都已經可以玩足一日啊！

Photo from Photo from 雪雲城堡官網

「雪雲城堡」位於台灣花蓮縣鳳林鎮，單聽到「城堡」兩個字已經相當吸引！門口嘅長鐵閘門，係特別為民宿園區設計而創作嘅，打開門入去就好似去咗另一個世界咁啊！喺城堡外望見庭園、屋頂設計同石磚外牆，已經好華麗同壯觀，叫得「城堡」果然名不虛傳！

Photo from Photo from FB@雪雲城堡 Castle of Hsuehyun

外面嘅設計已經令人嘆為觀止，入面都絕對唔馬虎㗎！大廳同樣設計得如歐洲風格嘅城堡一樣，不論係廚房、餐廳、甚至廁所都可以睇得出城堡主人經過一番精心設計，真係好靚啊！

Photo from Photo from FB@雪雲城堡 Castle of Hsuehyun

好多人會覺得以「城堡」作主題嘅住宿多數「得個樣」，但大家所見嘅大部分傢俬裝飾，都係真正嘅古董嚟㗎！

Photo from Photo from 雪雲城堡官網

由於民宿主人十幾年嚟收藏咗唔少古董珍品，包括古董餐具、藝術裝飾、中國瑞獸石雕、歐美骨董家具精品等，就連餐廳內嘅椅子都係民宿主人從唔同世界各地收集返嚟！

Photo from Photo from FB@雪雲城堡 Castle of Hsuehyun

連住宿都成個藝術館咁，所以絕對唔係有名無實，係真材實料啊！

Photo from Photo from FB@雪雲城堡 Castle of Hsuehyun

但都正因為城堡內嘅裝飾及家具太珍貴，所以暫不款待12歲以下兒童或寵物入住，如果想一家大細去玩嘅朋友要注意啦！

而房型分為5款，多數為雙人床及兩張單人床兩種，5間房都以歐式鄉村風格為主，相當高貴！感覺就好似喺一個充滿古董藝術氣色嘅城堡內住咁啊！

Photo from Photo from 雪雲城堡官網

而交通方面，雖然住宿地點較偏遠，但由於有接送服務，所以都尚算方便！大家除咗可以自行駕車外，仲可以搭火車到「花蓮站」落車，再搭接駁車到達雪雲城堡，但記得要喺住宿前兩日，預約接駁車時間，雪雲城堡會安排付費嘅接駁車接送大家。若大家搭火車到「鳳林站」下車，可於上車前先聯絡雪雲城堡大約抵達時間，雪雲城堡會安排免費接駁車接送。

Photo from Photo from FB@雪雲城堡 Castle of Hsuehyun

而價錢方面當然不算便宜，但以有別於一般「為打造城堡感覺嘅住宿」而言，「雪雲城堡」不論內外設計同擺設，都好似一座真嘅城堡一樣，所以性價比都相當高㗎！5款房型價錢不一，以二人入住計算，一間房平日大約為台幣5,500-5,800一晚，約港幣$1,375-$1,450一晚；假日為台幣7,000-7,500一晚，約港幣$1,750-$1,875一晚；春節為台幣8,000-8,500一晚，約港幣$2,000-$2,125一晚。