觀塘復古日本風喫茶店，懷舊小小包廂超悠閒！自家製紅茶咖哩飯、層層疊8層高班戟塔、三層奶油蛋糕～

觀塘最近多左個日本領域？！講緊係呢間試業兩星期嘅日式喫茶店，又姐係日式cafe啊～入到去唔知仲以為自己入左隨意門飛左轉日本啊！

Photo from Presslogic

呢間只係開業兩個星期嘅cafe真係超超超超復古同日系啊！去過日本懷舊個種喫茶店就會知道，呢度真係好似搬左成個日本喫茶店番黎咁～
Photo from Presslogic

最靚莫過於呢兩個卡位包廂，係度影相真係感覺巧有FU的～人流都幾多，午市真係全場爆滿嫁，想坐到包廂一定要打去訂位啊！
Photo from Presslogic

野食都十足十日式嘅家庭料理，同日本料理一樣有好好調教過蔬菜、肉同穀麥比例，唔怪之得咁多人捧場啦！

TORIO招牌の青蘋紅茶咖哩飯 (Lunch set：$78)
Photo from Presslogic
呢個係佢地招牌嘅紅茶咖哩，係自己研發出黎嫁！可以揀配上雞扒肉或者牛肋肉。除左沙律之外上面仲加入唔少微微烤香嘅蔬菜，食落唔會好單調～側邊仲放上一球天然紫薯沙律！食哂一份真係好滿足嫁呢～

午市(12：00～15：00)同晚市(18：00～20：30)
都有另外4款套餐可以揀，包括日式拿玻里義大利麵配自家制三色菜肉丸球、薑醋豚肉蓋飯、薑醋豚肉炒義大利麵同日替吐司，全部畫一價錢都係$78！

到左下午茶時間(15：00～18：00)就有輕食同甜品提供！

雞肉牛油果柳橙三文治 ($68) (+ set drink $28)
呢個係推介之選黎嫁，輕輕烘香嘅麵包夾住牛油果、雞肉同柳橙，再加入芥茉醬，食落味道配合得好好！酸酸甜甜又帶點芥茉嘅刺激～好好味啊！
Photo from Presslogic

TORIO CAKE - 奶油味 ($48)
絕對唔可以錯過佢地自家制嘅呢款蛋糕啊！！！一共有三層，上面係微微焦糖化嘅軟綿口感，中間夾住係相對企身嘅濃厚奶油蛋糕，而底部係超綿滑布丁～一啖有齊三個口感會唔會太幸福啊啊啊啊～～～
Photo from Presslogic

水果PANCAKE塔 ($78)
呢度嘅PANCAKE塔真係唔可以睇少，小編仔細數一數有成8層咁多啊！！！！！班戟軟綿、食落唔會好粉，上面舖上海量嘅生果同淋上焦糖醬！應該要兩個女仔先可以食得哂～
Photo from Presslogic

除左佢地自己研發嘅菜式，呢度仲提供好貼近日本喫茶店嘅飲品同甜品！

JELLY PUNCH ($48)
加入唔同色嘅啫哩，真係望到都已經透心涼了～唔會太甜帶少少椰香！
Photo from Presslogic

焦糖布丁 ($38)
呢個甜品好似直情係日本喫茶店叫番黎咁啊！布丁都係布丁，但小編想讚呢度啲餐具真係好靚啊媽啊！
Photo from Presslogic

TORIO 喫茶部
地址：觀塘興業街16-18號美興工業大廈A座1樓4室
電話：3460 4882
營業時間：
星期一至六 12：00～21：00
星期日 12：00～18：00

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）