柬埔寨唔止得吳哥窟！西港被遺忘嘅隱世小島！零污染沙灘+住叢林高腳屋

講開柬埔寨，大家通常只會諗到去暹粒睇吳哥窟、金邊睇皇宮同博物館。其實除咗古跡遊，柬埔寨西港仲有數個被旅人遺忘嘅沙灘同海島，比起泰國、越南渡假城市更寧靜、更富原始風味！

西哈努克港（Krong Sihanouk）簡稱西港，位於柬埔寨西南方，係柬埔寨最大海港城市。香港人或者較為少去，其實當地西港同小島多年來被外媒評為「亞洲最佳沙灘之一」，風景當然非一般地靚啦！

西港4大知名沙灘水清沙幼，沙粒細白，當中以索卡沙灘（Sokha Beach）、勝利沙灘（Victory Beach）最為著名。

Photo from shutterstock

Photo from shutterstock

西港同時係遊客區，夜生活豐富。不過如果你同小編一樣，鍾意感受寧靜大自然，西港嘅離島就係你嘅世外桃源啦！西港嘅小島數十年來與世隔絕，直至近年先開發旅遊業，所以商業化同污染程度最低，遊客較少，能夠令你感受自然生態！

高龍島

高龍島有「亞洲夏威夷」美譽，同時係柬埔寨最大嘅島嶼。由西港搭船前往只需一個鐘。

Photo from shutterstock

海水清澈見底，呈唔同層次嘅碧綠！無論係歎日光浴，游水定玩水上活動都一流！

Photo from shutterstock

除咗沙灘，島上幾乎係叢林。想體驗海島原始風情，可以選擇柬式「高腳屋」旅館住返晚。

Photo from Booking.com

小木屋原始樸實，露台前臨沙灘海景，遠離繁囂，迎著海風感受自然寧靜。而且價錢唔貴，由港幣六十至三四百蚊一晚都有，任君選擇。

Photo from Booking.com

高坤島(Koh Koun)

佢同高龍撒冷島(Koh Rong Sanloem)可以話係高龍島嘅姊妹島，前者係當地浮潛聖地，後者則以茂密熱帶雨林，同埋天然瀑布形成嘅清涼泉池聞名。

Photo from shutterstock

Photo from shutterstock

以上三個島可以由西哈努克港報旅行團前往。前往西哈努克港交通便利，當地機場每日有內陸航班直接來往暹粒同首都金邊，另有長途巴士往來金邊。

如果去開暹粒、金邊又有充足時間，就不妨去埋西港同呢幾個小島，感受柬埔寨嘅另一面啦！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）