又燒着荷包啦！下北澤一日遊！古著/雜貨/黑膠唱片/祭典 尋寶必去聖地！

去日本除咗去啲受歡迎景點打卡影相外，去悶咗都應該搵啲少人去嘅地方行下！特別係景點太人多擠迫，大商場又只得國際品牌，如果大家中意捐窿捐罅搵古著、文青事物，下北澤喱個地方必地啱曬大家！特別係年青人去到，肯定燒着你荷包啊！

Photo from Shutterstock

如果大家自問熱愛行古著店、唱片店、劇場、有特色店舖等，又想遠離熱門景點，咁就記得草定錢去下北澤啦！下北澤呢個地方雖看似古舊，完全唔係遊客中意嘅地方，而事實上下北澤都比較少香港人到訪，但只要你係熱愛復古衣物、文青生活嘅年青人，下北澤對你而言絕對係必到寶地啊！

Photo from Shutterstock

下北澤位於東京市西側，由於較近明治大學同東京大學，因此一向都係年青人嘅集中地。而且仲多次於以年輕人為主嘅「最宜居住城市」調查中，排名前3位！當中最引人注目嘅當然係日本古着、70年代雜貨、舊玩具店等，逐漸發展成為一個充滿文藝情懷嘅小城市。

Photo from Shutterstock

如果大家到下北澤閒逛，當中可分為「下北澤北口商店街」及「下北澤南口商店街」2大區。下北澤北口商店街主要以咖啡店、二手古著服飾為主，而南口多為居酒屋、懷舊雜貨店、美食等為主，如果有幸仲要見到有唔少人表演Live Show添！

Photo from Shutterstock

Photo from Shutterstock

如果大家喜歡懷舊復古服飾，北口嘅古著商店絕對會燒到你荷包無曬錢！原因除咗靚同日本製之外，價錢都絕對令你發狂！喺香港隨時過千蚊一件嘅古著，喺下北澤可能2、3百蚊已有交易，只要大家花啲心思慢慢行周圍搵，必定有啱心水服飾，所以勸大家帶多啲錢去為妙啊！

Photo from Shutterstock

除咗古著服飾，唱片店、音樂都係下北澤嘅一大特色，除咗有可容納幾百人嘅LIVE HOUSE，仲有出售黑膠碟嘅唱片舖、售賣日本獨立音樂CD嘅咖啡廳、書店等，仲會不時舉行音樂祭，中意日本音樂嘅朋友都應該要嚟下北澤啊！

Photo from Shutterstock

下北澤每年7月都會舉行「下北澤音樂祭」，當中會串連唔到下北澤LIVE HOUSE、唱片行、咖啡店、劇場等一同舉行街道式嘅音樂祭，到時一定會超熱鬧又有氣氛！

Photo from 下北澤音樂祭官網

Photo from 下北澤音樂祭官網

2月仲有「下北澤演劇祭」，以位於下北澤嘅本多劇場為首，聯同當地多個劇場及團體，喺2百多個舞台上舉行演劇祭！

Photo from 下北澤演劇祭官網

而8月嘅「下北澤夏祭」，當然唔少得煙花、浴衣、跳舞、音樂啦，完全可以體驗日本傳統祭典嘅樂趣啊！

Photo from Shutterstock

Photo from Shutterstock

至於9月「下北澤八幡神社例大祭」，大家仲有機會抬神轎、唱歌等，諗起都令人興奮！咁多豐富活動，記得睇準時間去大開眼界啊！

如果大家有興趣到下北澤，交通都非常方便！大家可乘搭小田急電鐵嘅小田原線，或乘搭京王電鐵嘅井之頭線，於下北澤落車便可！

圖片來源：Shutterstock、下北澤演劇祭官網、下北澤音樂祭官網

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載