旅遊時也要想想動物權利！驢仔慘被騎到骨折 希臘政府禁癡肥過重遊客騎驢

騎驢、騎馬都係熱門旅遊觀光活動，不過當遊客享受片刻快樂時，有無諗過動物喺服務我哋背後要承受幾多痛苦呢？喺希臘著名旅遊勝地聖托里尼島（Santorini），騎驢同樣大受觀光客歡迎，不過隨住觀光客愈來愈多，唔少載客驢因過勞同乘客過重而嚴重受傷。當地政府有見及此，近日下令禁止過肥人士騎驢。

據外媒報導，由於聖托里尼島係丘陵地形，要前往島上景點必須行斜路同樓梯，汽車無法駛進，騎驢代步係當地人傳統。不過隨住旅遊業開發同喺5月至10月旅遊高峰期，當地載客驢可以話係不勝負荷。

Photo from Help the Santorini Donkeys

Photo from Help the Santorini Donkeys

當地動物保育人士指，載客驢被迫一星期七日長時間「工作」，連續數小時載著重磅旅客無間斷行樓梯，喺缺乏休息嘅情況下，令佢哋出現毛皮磨損、脊髓損傷、骨折等問題。而且驢仔毛皮被磨損後，就更容易因染上細菌而生病，更可憐嘅係，大部份飼主都唔願意花錢為驢仔醫病，患病驢仔最終通常被放生等死。

喺保護動物的組織「Help the Santorini Donkeys」專頁上，就有唔少驢仔因載客而出現損傷嘅相片。

Photo from Help the Santorini Donkeys

Photo from Help the Santorini Donkeys

Photo from Help the Santorini Donkeys

希臘當局就下令，為保障驢仔嘅動物權利，驢仔唔可以乘載重量超過100公斤，或者是超過驢仔體重5分之1嘅人，而且頒佈指引要求飼主為驢仔提供人道、安全同衛生嘅居住同工作環境。

乘坐動物喺世界各地都係常見旅遊活動，大家下次去旅行時除咗求開心，不妨都想想對動物帶來嘅影響！

資料來源：《英國郵報》、「Help the Santorini Donkeys」

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）