走「塑」有辦法！香港推甘蔗飲管；韓國研「食得」大米飲管！

香港人「塑」量非常龐大！根據環保署2014年發佈嘅「香港固體廢物監察報告」，香港人平均每日棄置喺堆填區嘅塑膠廢料，多達二千幾公噸，足足等於144架雙層巴士。

近年香港餐廳越嚟越重視環保，先有KFC停用同走杯蓋，後有3大連鎖快餐店聯手，外賣時唔拎餐具，儲夠印花就可獲一套環保餐具........好多香港人亦開始使用玻璃飲管、不鏽鋼飲管，唯呢啲飲管成本太貴，唔足以吸引大眾廣泛使用。

Photo from shutterstock

Photo from 大快活

Photo from shutterstock

早前台灣環保品牌「100%植」推出以甘蔗渣做原材嘅甘蔗飲管最近進軍香港。呢款飲管雖然係一次性，但因為用料天然，又可被自然分解，可以替代坊間嘅不可分解嘅塑料飲管。即使佢唔能夠應用喺熱飲度，但仍獲大眾支持！產品有三個尺寸選擇，分別係6mm、8mm同12mm闊。市民可以透過網上落單，一包份量為50-100支，6mm嘅管口裝，100支賣$73港元，單支平均約7毫子港幣。而適合飲珍珠奶茶嘅12mm裝，每包50支，售價$83港元，每支飲管平均價係$1.7港元。雖然依家只有網店出售產品，但希望其後都會有更多香港分銷點，等香港普及使用環保飲管！

Photo from 100%植官網

售賣地點：100%植、官方授權嘅網店「queentiff」

另外，韓國亦成功研發生產「食得」嘅大米飲管，開發者向傳媒透露，飲管成分除咗有大米，仲有木薯，令飲管結實而且富韌性，質感偏硬，有啲人話：「口感有啲似飯焦」，又有啲話似薯仔整成嘅年糕，仲話好味過意粉添～實情係點，小編都唔知，等大家自己買番去試下～

Photo from 黑龍江網絡廣播電視台

Photo from 黑龍江網絡廣播電視台

大米吸管依家每個月產量約3億支，平均批發價係每支15韓元（約港幣1毫子）。大米飲管可以喺熱飲裏面浸2至3個鐘，凍飲嘅話仲可以留更長嘅時間添～

Photo from shutterstock

不可分解嘅塑膠嚴重傷害我哋居住緊嘅地球，如果香港多引入／研發更多呢啲低成本嘅環保飲管同餐具，有望可以推動全民減廢！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）