【遊客過多】居民不勝其煩！奧地利靚景小鎮Hallstatt下年起採遊客管制

有「世界最美小鎮」之稱嘅奧地利小鎮哈爾斯塔特（Hallstatt），近年遊客量急增，對小鎮居民生活產生滋擾。據德國《世界報》同奧地利《皇冠報》報道，當地市政廳決定由下年起，採取遊客管制措施。  哈爾斯塔特原本只係一個有770名居民嘅簡樸小鎮，不過因為擁有著湖泊美景同世界上最古老嘅鹽礦，於1997年被聯合國教科文組織列為世界文化遺產，更成為旅遊熱點。

Photo from shutterstock

近年有中國商人喺廣東惠州將小鎮複製成「山寨版」，更令哈爾斯塔特聲名大噪，每年吸引到數以萬計嘅內地遊客到當地旅遊。

據奧地利數據統計，單係2018年於哈爾斯塔特過夜嘅中國遊客就有兩萬一多人，佔當地遊客總數15.3%，呢個數字仲未計其他國家嘅遊客，可想而知當地要應付嘅旅客量何其多。

Photo from shutterstock

雖然遊客會為小鎮帶來收入，但可惜唔少遊客只作短暫停留，齋影相無幫襯當地小店，對當地經濟效益有限，人流太多反而影響居民日常生活。例如有亞洲旅客唔打招呼就闖入民居，或擅自到花園休息。另外，遊客使用航拍機都令居民擔心私隱問題。

當地市政廳有見及此，決定採取新措施減低遊客量：旅游巴數量限制至1.3萬輛，並且所有開入小鎮嘅旅遊巴必須持有門票，同時每日限定門票數量。

另外，為減少「齋影相無幫襯」嘅遊客，當地更立例延長遊客喺鎮內嘅逗留時間，旅客必須停留至少2.5小時。大家計劃前往小鎮嘅話，就要留意行程安排啦！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）