【週末好去處】3個文青浪漫郊遊打卡好地方！Netflix節目都去取景～情侶／朋友都啱去！

武漢肺炎疫情持續，好多人都想離開市區，到郊區呼吸吓新鮮空氣～等小編介紹3個香港小清新郊遊好地方，就連Netflix節目都去取景咖～

1.水鄉風情大澳
最近Netflix有套自家制節目《海景餐廳急救隊》（Restaurants on the edge）去咗大澳一間海景餐廳取景，仲幫嗰間餐廳嚟個大改造，變成一個簡約漁村風嘅文青西餐廳！一邊吹住微微海風，一邊睇書，心情都即刻平靜落嚟，可以暫時逃離市區生活嘅壓力，非常愜意舒服。

Photo from Facebook@大澳榕樹頭

你亦都可以坐住小船，環遊大澳，欣賞吓周邊嘅水上棚屋、有「東方威尼斯」美譽嘅大澳風景！同另一半去就更浪漫啦～直頭係唯美愛情劇嘅必要元素啦～

Photo from Facebook@大澳榕樹頭

泛完舟，仲可以行山，睇吓大瀑布，好似去咗個與世無爭嘅世外桃源咁～勁似古裝劇拍村姑洗衫、偷窺美男沖涼嘅水塘～好彩嘅話，仲可以遇到條活潑可愛嘅粉紅海豚添～

Photo from HolidaySmart

2.香港後花園西貢
講開西貢，第一時間就會諗起食海鮮～除咗食之外，佢收藏住好多絕美秘境，絕對係「香港後花園」。星期六日、放假嘅日子，可以去西貢綠洲「榕樹澳」踩吓單車，划住獨木舟去白沙洲！望住藍天白雲、周圍遊山玩水簡直係小編最嚮往嘅退休生活啊！

Photo from HolidaySmart

Photo from HolidaySmart

3.耕作遊錦田
元朗錦田有個有機菠蘿園，無論同朋友定另一半去，都會回憶滿滿～喺城市生活，所有食物都好易買到，總有一間超市喺附近～放假嘅時候，不妨到郊外行吓，充當一日農夫，親自種植、收割又大又甜嘅菠蘿，滿足感大爆發！嗰度仲有Q萌草泥馬添～

Photo from HolidaySmart

Photo from HolidaySmart

之後仲可以去埋流浮山睇日落、打吓卡！聽人講流浮山嘅日落係香港數一數二咁靚，帶埋另一半去即刻加晒分，喺個咁浪漫嘅地方，講咩都應承啦～

Photo from HolidaySmart

睇完日落，可以去食流浮山出晒名嘅海鮮添～過住呢啲生活，都咪話唔爽啊！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）