被藥師如來加持過！日本京都仁和寺手工特製和紙摺疊口罩　每日限量200個～

受到新冠肺炎（武漢肺炎）疫情影響，早前玄學家李居明就喺網上教大家口罩加持法抗疫，引嚟唔少網民熱議。

但原來喺日本京都真係有依個咁特別嘅口罩㗎！

喺日本京都嘅「世界遺產」仁和寺，最近就推出咁一款特製嘅「口罩」發放畀參拜嘅信眾。

Photo from shutterstock

依款口罩以和紙摺疊而成，口罩中印有代表藥師如來嘅古代梵文圖案，以表示藥師如來拯救世人脫離病痛嘅慈悲心。

Photo from 仁和寺@Twitter

據《Maidonanews》報導，口罩原名為「覆面（ふくめん）」，係佛教僧侶為咗喺佛前獻花時，避免自己唔乾淨嘅氣息沾上佛像而使用嘅道具。

「覆面」所用嘅和紙名為「奉書紙」，經六摺後再鑽洞穿線，寬約20公分、長約9公分。

Photo from 仁和寺@Twitter

而奉書紙上亦會印著代表藥師如來嘅古代梵文圖案。

Photo from 仁和寺@Twitter

由於「覆面」係由僧侶及職員手工製作，包含摺紙、蓋印、鑽孔、穿線等手續，一天大約能夠製作200個。完成後會喺每天早晨禮拜時供奉於藥師如來像前，祈求祝福。

而為防止疫情擴大，仁和寺嘅執行長吉田正裕，就決定自即日起向參訪嘅信眾發放特製「口罩」。

Photo from 仁和寺@Twitter

不過，雖然寺廟有提供「口罩」畀大家，但執行長吉田正裕亦呼籲：「依個講到底都只係宗教性質嘅道具，出發點依然希望可以令大家意識到戴口罩嘅重要性。」

其實依家疫情都未受控，如非必要大家都係戴番個罩喇～

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）