外國網民票選 2020 年最佳韓劇 Top 10　《愛的迫降》唔係第一！《夫婦的世界》不入十大！

2020 年韓劇有好多話題之作，好似《愛的迫降》、《夫婦的世界》及《雖然是精神病但沒關係》等，早前外國投票網站 King Choice 舉行咗「2020 年最佳韓劇」嘅投票，有超過 600 萬票，到底喺外國網民心中邊套係最佳韓劇呢？

第十位：《我們，愛過嗎》
《我們，愛過嗎》由宋智孝、孫浩俊、宋鍾鎬、具子成及金敏俊主演，係一套浪漫愛情劇。故事講述獨自撫養孩子 14 年嘅單身媽媽「盧愛情」（宋智孝 飾）身邊突然出現咗一個性格唔好但被吸引嘅男人、一個吝嗇卻出色嘅男人、一個可怕卻性感嘅男人及一個年輕又令人心動嘅男人，展開「五角關係」。

Photo from JTBC

劇集喺韓國嘅討論度唔高，宋智孝嘅海外人氣相信對劇集有唔少幫助。

Photo from JTBC

第九位：《雖然是精神病但沒關係》
《雖然是精神病但沒關係》由金秀賢、徐睿知主演，劇集紅極一時。故事講述心地善良但有著沉重負擔嘅精神病院男看護「文鋼太」（金秀賢 飾）遇上擁有反社會人格嘅童話女作家「高文英」（徐睿知 飾），兩人互相撫平彼此嘅傷痛，展開一場浪漫嘅愛情故事。

Photo from tvN

劇集播出時喺韓國同其他亞洲地區反應非常熱烈，徐睿知更因劇集爆紅，劇中嘅「蝴蝶擁抱」更成為熱話。

Photo from tvN

第八位：《機智醫生生活》
《機智醫生生活》由曹政奭、柳演錫、鄭敬淏、金大明及田美都主演，第一季人氣相當高，因此開拍第二季並於 2021 年播放。故事以醫院為背景，圍繞五個醫大同期好友，講述發生喺醫院嘅溫馨故事。

Photo from tvN

劇集並冇狗血劇情，反而非常輕鬆明朗，相信呢點都係吸引觀眾嘅一大原因。第二季將於 2021 年播出，相信又會掀起一股熱潮。

Photo from tvN

第七位：《Do Do Sol Sol La La Sol》
《Do Do Sol Sol La La Sol》由李宰旭、高雅拉主演，故事講述家道中落嘅鋼琴家「具蘿蘿」（高雅拉 飾）遇上神秘打工仔「鮮于俊」（李宰旭 飾），兩人帶著各自嘅傷痛聚集喺鄉下嘅鋼琴學院，並展開一段浪漫愛情故事。

Photo from KBS

男主角李宰旭憑韓劇《偶然發現的一天》爆紅，被稱為「玄彬接班人」，今次首度擔正男主角，不過劇集喺韓國反應一般，喺外國反應咁好相信男女主角嘅人氣都係其中一個原因。

Photo from jxxvvxxk@IG

第六位：《九尾狐傳》
《九尾狐傳》由李棟旭、金汎及曹寶兒主演，講述九尾狐「李硯」（李棟旭 飾）曾係古代嘅山神，為咗拯救愛人「亞音」（曹寶兒 飾）而放棄山神職位，到咗現代仍努力尋找已投胎嘅「亞音」，之後遇上「亞音」轉世嘅節目製作人「南智雅」（曹寶兒 飾）後展開嘅奇幻愛情故事。

Photo from tvN

劇集討論度非常高，而金汎亦都憑此劇再度爆紅，即使劇集已經迎來大結局，不過熱潮依然。

Photo from tvN

第五位：《喪屍偵探》
《喪屍偵探》由崔振赫、朴柱炫主演，故事講述復活兩年嘅喪屍——偵探事務所 CEO「金武英」（崔振赫 飾）喺人類社會孤軍作戰去解開自己嘅身世之謎。劇集雖然係喪屍題材，不過都有輕鬆搞笑位，係一套驚悚動作喜劇。

Photo from KBS

劇集喺韓國討論度一般，不過深受外國觀眾喜愛，睇嚟外國觀眾幾鍾意喪屍題材。

Photo from KBS

第四位：《便利店新星》
《便利店新星》由池昌旭、金裕貞主演，改編自同名漫畫。故事以便利店為背景，講述心地善良嘅「惡女」「丁新星」（金裕貞 飾）對便利店店長「崔大賢」（池昌旭 飾）一見鍾情，並到便利店做兼職生，兩人展開一段搞笑又浪漫嘅愛情故事。

Photo from SBS

劇集播出時有唔少爭議，因為原著係 19 禁漫畫，而且橋段太大膽，有網民覺得唔合適，劇集更接獲多宗投訴，不過呢啲爭議都無阻劇集喺外國觀眾心中嘅地位。

Photo from SBS

第三位：《惡之花》
《惡之花》由李準基、文彩元主演，講述「都賢秀」（李準基 飾）係被警方通緝嘅疑犯，後來改變身分成為「白熙成」，並與刑警「車志元」（文彩元 飾）結婚，其後「車志元」發現丈夫身分，為愛人親自銬上手銬。

Photo from tvN

《惡之花》播出時反應相當唔錯，兩位主角嘅演技備受讚賞，李準基更憑此劇再次爆紅。

Photo from tvN

第二位：《愛的迫降》
《愛的迫降》由玄彬、孫藝真主演，稱為「神劇」應該不為過，因為劇集播出時風靡亞洲，深受觀眾喜愛。故事講述南韓財閥「尹世理」（孫藝真 飾）因為滑翔傘意外而誤墜北韓，遇上北韓軍官「利政赫」（玄彬 飾），兩人展開一段南北韓禁忌之戀。

Photo from tvN

劇集因為以南北韓為題材所以喺韓國嘅討論度非常高，加上又係玄彬與孫藝真主演，令劇集人氣高企，喺亞洲其他地區亦一樣深受觀眾喜愛。

Photo from tvN

第一位：《The King：永遠的君主》
第一位就係李敏鎬、金高銀主演嘅《The King：永遠的君主》！故事以平行時空為題材，講述大韓帝國皇帝「李袞」（李敏鎬 飾）偶然之下穿越到大韓民國，遇上刑警「鄭太乙」（金高銀 飾），兩人展開一段愛情故事並聯手對抗大反派。

Photo from SBS

劇集未播之前討論度非常高，因為由「金牌編劇」金銀淑執筆，演員陣容又鼎盛，可惜播出後被指劇情太燒腦、複雜，收視不如預期。不過劇集喺外國非常受歡迎，相信同李敏鎬、金高銀嘅高人氣有一定關係。

Photo from SBS

估唔到外國觀眾嘅口味同亞洲觀眾都有啲分別，大家心目中嘅最佳韓劇又係邊套呢？

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）