奇招吸引住客！英國酒店checkin入住前要玩密室逃脫　成功解謎拎房間鑰匙先有得住？

每次去旅行除咗準備行程之外，當然梗係要精心揀間啱自己嘅酒店喇！而喺英國就有一間酒店為了吸引客人，就推出喺客人正式入住前，需要先玩一場遊戲嘅奇招，住客們要喺限時內完成遊戲任務搵出房間鑰匙，先可以進入舒服嘅房間。咁會唔會真係有人完成唔到遊戲而冇得住㗎？！

依間位於英國雅息士郡（Essex）嘅酒店 The Clockwork Hotel，就為咗可以令客人喺正式入住前先了解吓酒店嘅環境設備，住客喺辦理入住時需要先玩遊戲，大家要喺限時 1 小時內喺「密室逃脫」遊戲中搵出鑰匙，先可以進入房間～

Photo from The Clockwork Hotel

酒店設施齊全，一共有 11 間客房，並設有小型酒吧以及備有熱水浴缸同桑拿房嘅水療中心，而喺客廳仲有壁爐添呀！

不過想用依啲設施就要先玩密室逃脫遊戲喇！

遊戲設定限時 1 個鐘，客人可以透過解謎搵到房間鑰匙嘅相關線索，喺解謎成功後就會得到房間鑰匙。不過就算唔擅長玩依類遊戲嘅大家都唔使擔心，事關酒店主人推出依個遊戲嘅目的係相大家可以熟悉酒店，趁機會喺酒店入面行吓，喺遊戲時間結束後都會畀番鑰匙大家可以返客房休息嘅。

Photo from The Clockwork Hotel

不過有嘢一定要提大家就係，據官網指酒店首嘅預定人數最少為 16 人，而最多則可容納 22 人，係一個非常適合同家人/朋友開 party 聚會嘅地方嚟。

Photo from The Clockwork Hotel

至於價格方面，入住一晚，週日到週四人均 110 英鎊（約 HKD$1,143），週五、六及公眾假期則人均 150 英鎊（約 HKD$1,559）。

另外，如果喺平日只係想聚會嘅話亦都的，白天人均 30 英鎊（約 HKD$312），晚上人均 60 英鎊（約 HKD$624），價用包括餐點（晚餐為3 course dinner）、雞尾酒。

有機會去當地玩，不妨去住吓～

The Clockwork Hotel
官網：LINK

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）