濕疹要戒口！忌吃8類食物　教你4招舒緩濕疹

春天天氣潮濕，濕疹好易復發，濕疹一發最緊要就係戒口，有8類食物一定要小心！而除咗戒口，再教4招舒緩濕疹嘅方法。

濕疹係由多種因素引起嘅皮膚病，患上濕疹通常會感到痕癢，而且濕疹容易復發，對患者嘅生活造成困擾。除咗天氣嘅影響外，飲食都要格外留心，一定要戒口，以下呢8類食物就要小心啦。

雞蛋

雞蛋係常見嘅致敏源，唔可以食雞蛋之外，就連含有雞蛋或少量蛋液嘅食物都要注意，好似蛋糕、麵包等。

Photo from Pinterest

牛奶

牛奶中含有多種容易引起過敏嘅蛋白質，如酪蛋白、α 乳蛋白素 及 β 乳球蛋白抗體等都係最主要嘅過敏源，除咗牛奶之外，一啲奶製品如芝士、麵包等都要避免。

Photo from Pinterest

海鮮

好多海鮮性質寒涼，食得多有時仲會引起腹瀉，加上海鮮容易惹濕，會加重濕疹症狀。

Photo from Pinterest

糯米

糯米性溫，係黏滯之物，食得多糯米會加重人體濕熱，濕疹患者一定要避免。

Photo from Pinterest

芋頭

芋頭同糯米一樣都係黏滯之物，食得多會阻礙脾臟嘅去濕功能，令人體濕毒積聚難以消除，加重濕疹症狀。

Photo from Pinterest

酒精飲品

酒係濕熱之物，飲酒會增加人體嘅濕熱，助長濕疹。

Photo from Pinterest

辛辣刺激食物

辛辣刺激嘅食物好似辣椒、蒜及薑等會刺激引發濕疹。

Photo from Pinterest

補品補藥

濕疹患者最忌就係進補，因為補品補藥大多係熱性之物，會使人嘅內熱加重，更加容易引發濕疹。

Photo from Pinterest

除咗戒口，都要注意平時嘅生活習慣，咁先有助舒緩濕疹。

保持心境開朗

濕疹對生活一定會造成困擾，導致患者情緒低落，但其實情緒鬱悶會影響肝氣鬱滯，從而生熱，咁樣反而會加重濕疹嘅症狀，所以要經常保持心境開朗。

Photo from ssinz7@IG

沖涼時注意水溫

沖涼嘅時候要注意水溫唔好過熱，以免引起皮膚痕癢。

注意護膚

唔少人可能會覺得如果有濕疹就唔好再搽太多護膚品，以免加重症狀，但其實適當為皮膚搽一啲無添加嘅補濕護膚品都係冇問題嘅，不過就愈簡單愈好，同時都要注意護膚品成分。

飲食均衡

雖然患上濕疹要戒口，但多食新鮮蔬果對濕疹患者係有益嘅，因為維他命 C、E 可以提升皮膚免疫力，滋潤皮膚。不過要留意，芒果、榴蓮及黃梨等容易令人體積熱嘅水果就千萬唔好食，以免加重病情。

Photo from Pinterest

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）