港女慘做「白老鼠」初嘗妹妹自製甜糭 全家中伏 網民： 其實都幾有創意～

端午節就到喇，相信唔少人都會食糭應節～最近，有位港女就喺討論區訴苦表示妹妹學識咗包糭，仲開始自創新口味比家人品嚐，其中一個餡料更加係聞所未聞，令港女食完大受衝擊！

Photo from TVB

端午節就到，相信好多人都會買糭，甚至會自己親手包糭準備過節。日前，有位港女就喺香港討論區表示妹妹最近跟媽媽學習包傳統嘅三角糭，不過喺教完之後，媽媽就已經偷偷同佢講「千祈唔好試食佢整嘅糭！」，話一定會後悔。

Photo from 香港討論區

之後，妹妹就將自己蒸好嘅糭攞出嚟，就咁睇賣相都尚算不錯，同普通嘅糭冇咩分別，擺碟亦擺得幾靚。不過，打開咗之後就有種說不出嘅奇怪！港女就話妹妹分別整咗鹹糭同甜糭，佢就先嘗試咗最保險嘅鹹糭先。一放入口就發現妹妹用咗臘肉同臘腸去代替肥豬肉，佢仲話食食吓差啲以為自己食緊臘味飯。

Photo from TVB

妹妹就同佢解釋「糭又喺用糯米整，糯米飯又係用糯米」，自己整嘅時候只係加多咗瑤柱同臘肉。由於糭喺蒸嘅，搞到口感比糯米飯黏好多，再加埋臘肉嘅油，令港女食咗少少就已經食唔落！

Photo from TVB

妹妹隨即就攞埋佢自創嘅「甜糭」，一打開竟然發現妹妹將芒果放咗入去，仲話係芒果糯米飯嚟！港女表示十分驚嚇，但為咗唔浪費妹妹嘅心機就嘗試食。只係食咗三份一就已經想嘔，仲話原來蒸熟咗嘅芒果味道同垃圾房好似…

Photo from TVB

唔少網民睇完都對港女表示同情，大讚佢好勇敢！有唔少網民亦開始分享佢哋自己嘅經歷：有網民整過朱古力飯，但發現好難食；有網民就表示鄰居因為知道蒸橙可以止咳，竟然連肉一齊蒸，搞到成層都好臭！

Photo from 香港討論區

Photo from 香港討論區

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）