日本11月起近770種食品加價！酒類/飲品加價最多，牛奶/乳製品相繼加價

最近好多香港人飛日本自由行，喺日圓貶值嘅情況下，日本出現通脹，10月起有超過6,000種食品加價，加價更將延續至11月，再有近770種食品加價，其中酒類、牛奶、乳製品、飲品嘅零售價都各有唔同嘅加幅。

雖然日圓大跌令唔少人都想去日本掃貨，不過亦因為呢個原因日本企業嘅來貨價格亦上脹唔少，唯有加價以維持返企業利潤。今年10月起日本市面上已有超過有6,000種食品加價，平均加幅達一成。

根據《日テレNEWS》報道，加價產品包括多種新鮮食材、電器、日用品等。喺香港開設多間分店嘅連鎖迴轉壽司店「壽司郎」10月起加價，每碟加10至30円。最平100円壽司，連稅一碟為110円（約$5.9港元），加價後連稅120円一碟（約$6.4港元）。

另一間港人至愛嘅牛丼專門店「松屋」同樣有6款商品加價，而大阪熱門景點環球影城（USJ）成人一日門票價錢由9,400円（約$503港元）加至9,800円（約524港元）。

日本10月加價最多嘅產品係飲品等，可口可樂、伊右衛門綠茶、午後紅茶由140円加至160円，酒類方面Asahi朝日亦都有加價。加價潮持續，《日テレNEWS》報道指出11月將有約770種食品加價。

日本中華料理連鎖店「餃子の王将」嘅一人份煎餃喺關西地區嘅分店將由連稅264円（約$14.1港元）加至275円（約$14.6港元）。Mister Donut亦有39種商品加價，加幅由10円至20円不等。

另外牛奶等乳製品亦都有加價，雪印、森永3大品牌嘅多種乳製品貴2.8%至10.2%，有指日本嘅加價潮或將達到30年以嚟嘅最大規模！

相關文章：日本5大燒肉放題店推介 通宵營業燒肉放題 CP值超高炭火燒肉

相關文章：日本聖誕點燈2022｜大阪梅田哈利波特主題燈飾表演！13米聖誕樹必打卡

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）