余文樂潮牌實體店MADNESS將執笠！網民不滿臨走都賺到盡：學吓陳冠希！

By Wing Ws on 20 Feb 2023

Digital Content Writer

余文樂喺2014年成立嘅服裝品牌「MADNESS」最後一間實體店——北京三里屯旗艦店月前就有疑似結業嘅傳聞，近日，MADNESS官方亦證實有關消息，最後一間實體店將於本周六（25日）結業，並於店內舉辦感謝祭，打折清貨。但網民似乎唔太滿意店舖嘅最終優惠，仲叫余文樂學吓佢嘅死對頭陳冠希！

Photo from 余文樂 IG

條隊幾個人要排40分鐘？

臨結業之際，MADNESS北京店於最後一周2月18至25日推出打折促銷優惠，據到場購買嘅網民所指，店內全部商品打5～7折，價錢以900RMB（港幣約1000元）居多，當日有兩名店員於店內工作，得2個試衣室，而且進店嘅顧客又冇限時，搞到條隊唔長但排隊時間長，該名網民於店外排隊約40分鐘才能進場。另有網民指，到門市購物時，店內得幾件衫兼顧客僅有3～5個人，但就唔畀入去，令佢非常不滿。

Photo from 微博

Photo from 小紅書

對於MADNESS實體店倒閉嘅消息，網民留言表示：「終於倒閉了」、「倒閉的好，三里屯店員太拽了」、「倒閉是遲早的事」，有網民嘲笑余文樂「一手好牌打得稀爛」、「天天拗個潮流教父的人設，結果十幾年如一日的只會抄抄抄」、「這幾年根本不用心」。

Photo from 小紅書

網民建議余文樂向陳冠希取經

不過亦有唔少網民覺得MADNESS嘅折扣力度不足：「最後一周，然後只打5到7折？？？那不如別做生意了，直接原價吧」，對此，有網民以余文樂嘅死對頭——陳冠希嘅品牌CLOT比較。上年7月，陳冠希創辦嘅潮牌店JUICE同撤離北京三里屯，不過當時嘅清貨價達至2折，因此有網民認為余文樂品牌畀嘅折扣表現唔夠有風度，建議佢向陳冠希取經：「隔壁冠希倒閉時候都是2折，六子才5折，臨走還要坑一筆」、「真吃爛錢吃習慣了，2折能清光就不錯了」、「多學學evisu（陳冠希），清庫存的時候真1-2折出」。

Photo from 小紅書

MADNESS喺北京仍有新搞作？

曾經風光一時嘅潮牌店MADNESS，喺經歷抄襲、政治等風波後，形象插水，網絡上仍有唔少負面批評，更有指MADNESS會執晒成個品牌，不過據官方發佈嘅消息所指：「MADNESS北京店將於2月25日完成這七年多以來的任務，我們稍後將以另外一種形式於北京和大家再次見面！敬請留意。」雖然北京三里屯嘅實體店執笠，但似乎官方喺當地仍有新搞作！

Photo from 微博

死對頭陳冠希品牌越做越大！

與MADNESS同樣係貴價品牌，但陳冠希嘅品牌就越做越大，陳冠希創辦嘅潮流品牌CLOT近年聯乘嘅企劃都製造咗唔少話題，由Levi's、Nike、Air Jordan 5 Low、Timeberland、CASETIFY手機殼等，到最近同The North Face出最新聯乘嘅粉彩系列，夢幻配色獲網民大讚！除此之外，時尚選物店JUICE都越做越多間，香港就有4間，門市亦遍佈中國、台灣、美國，就連夏威夷都有！睇嚟陳冠希品牌事業嘅發展，未來都好值得期待！