32歲單文柔未入行已迷戀陳展鵬，得老公欣賞自己：識出街/用杯飲水都話叻

娛樂新聞

By Moon Lam on 10 May 2022

Digital Content Writer

單文柔Phoebe同陳展鵬結婚三年多，近日就係陳敏之嘅個人Youtube頻道《chit chat》做節目嘉賓，分享從迷戀偶像到圓夢成為偶像伴侶嘅經歷，更加提到迷戀陳展鵬嘅原因係因為對方成日因為啲小事讚佢？

Photo from 單文柔IG ＠smyphoebe

追看陳茵媺卻被陳展鵬吸引

單文柔係陳敏之嘅個人Youtube頻道《chit chat》做節目嘉賓嘅分享同陳展鵬相戀嘅經歷，指自己係英國讀書會成日睇劇，主要都係為左睇陳茵媺，但無意間被陳展鵬吸引。

Photo from Youtube頻道陳敏之 Sharon Chan

佢更加話由以前到依家都一樣咁迷戀陳展鵬，指陳展鵬「始終都係咁靚仔」，言談間感受到佢真係好愛對方，連陳敏之聽到都表示甘拜下風！

Photo from Youtube頻道陳敏之 Sharon Chan

男方主動結識靠IG傳情

單文柔參選港姐時陳展鵬係當年嘅評判，但自己當時只係想做好自己，並無特別理會台下係自己嘅偶像，不過陳敏之就話記得當年泳裝環節，陳展鵬一見到Phoebe已經露出對佢有意思嘅表情！

Photo from Youtube頻道陳敏之 Sharon Chan

原本兩人只有一面之緣，一年後先因為經紀人牽紅線，令佢地有機會係後台合照，男方更加主動要求Phoebe send返相，兩人靠IG發展感情。

Photo from Youtube頻道陳敏之 Sharon Chan

拍拖因對方「盲捧」冧爆

單文柔指自己參選港姐並唔係為左結識陳展鵬，亦無諗過可以同偶像一齊，但到真係拍拖個陣因為對方成日讚自己而更加迷戀陳展鵬。佢提到身邊人通常都係笑佢「笨、慢、不太聰明」，但自己只係安排或者做左啲小事，陳展鵬就會讚佢好乖好勁，就連Phoebe識落街同識飲水都照讚佢「點解你咁叻嘅？」、「點解你會諗到呢樣野咁勁」！Phoebe話覺得展鵬識欣賞自己，係偶像眼中自己係特別嘅存在，係人都冧爆啦！

Photo from Youtube頻道陳敏之 Sharon Chan

女兒出生改變夫妻兩人

單文柔同陳敏之都話陳展鵬本身係比較沉默寡言嘅人。陳敏之就回憶以前同陳展鵬拍劇，拍完劇放飯陳展鵬只會講好多關於拍劇嘅想法，態度非常認真，令陳敏之覺得佢好嚴肅、唔敢同佢玩，但婚後唔少人都感受到佢嘅改變，拍新劇《黯夜守護者》時放飯唔再講拍劇，而係一齊討論育兒經，氹囡囡時更加連聲都變埋呀！女兒「小豬比」嘅出生令陳展鵬有活力，亦令單文柔對小朋友更加有耐性呀。

Photo from 陳展鵬IG ＠rucochan

陳展鵬曾讚單文柔有初戀感覺

其實除左單文柔非常迷戀陳展鵬，陳展鵬亦都曾經係清談節目《人夫放假約出去滾》提過對單文柔一見鐘情，覺得佢「好純、好乖、好簡單」，比到初戀嘅感覺佢。連網民都大讚單文柔大方得體夠自然！兩人結婚後一直幸福美滿，不時係社交平台大曬甜蜜合照，佢地表達愛意嘅方式真係羨煞旁人呀！

Photo from 單文柔IG ＠smyphoebe

傳單文柔離巢有新計劃

其實單文柔係讀時裝設計出身，係倫敦藝術大學倫敦時尚學院修讀布料設計，陳敏之就大讚佢係社交平台嘅相都好靚設計又叻，鼓勵佢自己做一門生意！

Photo from Youtube頻道陳敏之 Sharon Chan

單文柔所屬電視台最近傳出唔少離巢新聞，單文柔同電視台嘅合約都即將完結，佢近日就係社交平台出帖，並寫有「新開始」三個字，被指有可能係下一個離開電視台嘅藝人！但佢接受傳媒採訪時無承認會離巢，只係少參與幕前工作，但就指自己會有新嘅安排同計劃，想有多方面嘅發展，唔知係咪受到陳敏之嘅啟發呢！詳情就有待Phoebe公布啦！